D News: Oct 22: దిల్‌సుఖ్‌నగర్‌: విగ్రహాల నిమజ్జనంతో ట్రాఫిక్‌ అంతరాయం.. ప్రయాణికులకు ఇబ్బందులు
హైదరాబాద్‌ నగరంలో దుర్గామాత విగ్రహాల నిమజ్జనం కారణంగా పలు ప్రాంతాల్లో వాహనాల రాకపోకలకు తీవ్ర అంతరాయం ఏర్పడింది. ట్యాంక్‌బండ్‌ వైపు వేలాది విగ్రహాల ఊరేగింపులు కొనసాగడంతో నగరంలోని ప్రధాన రహదారులపై కిలోమీటర్ల మేర వాహనాలు నిలిచిపోయాయి. ఎల్బీనగర్‌ నుంచి దిల్‌సుఖ్‌నగర్‌ మీదుగా నగరంలోకి వెళ్లే ఆర్టీసీ, ప్రైవేట్‌ బస్సులు ట్రాఫిక్‌లో చిక్కుకున్నాయి. దీంతో ప్రయాణికులు తీవ్ర ఇబ్బందులు ఎదుర్కొంటున్నారు.
దిల్‌సుఖ్‌నగర్‌ వద్దే బస్సులను నిలిపివేత
ట్రాఫిక్‌ రద్దీని నియంత్రించేందుకు పోలీసులు కీలక చర్యలు చేపట్టారు. జిల్లాల నుంచి హైదరాబాద్‌కు వస్తున్న బస్సులను దిల్‌సుఖ్‌నగర్‌ వద్దే నిలిపివేస్తున్నారు. ఎంజీబీఎస్ బస్టాండ్‌కు వెళ్లాల్సిన బస్సులను ముందుకు అనుమతించకుండా ఆంక్షలు విధించారు. ఆర్టీసీ, ప్రైవేట్‌ బస్సుల్లో వచ్చే ప్రయాణికులు దిల్‌సుఖ్‌నగర్‌ వద్ద దిగాలని పోలీసులు సూచిస్తున్నారు. దీంతో చంటిపిల్లలు, సామాన్లతో ప్రయాణిస్తున్నవారు తమ గమ్యస్థానాలకు చేరుకోవడంలో ఇబ్బందులు పడుతున్నారు.
ప్రయాణికులకు పోలీసుల సూచనలు
విగ్రహాల నిమజ్జన ఊరేగింపులు పూర్తయ్యే వరకు నగరంలోని పలు మార్గాల్లో రాకపోకలకు ఆటంకాలు తప్పవని అధికారులు సూచిస్తున్నారు. అత్యవసర పనులు ఉంటేనే బయటకు రావాలని, సాధ్యమైనంతవరకు ప్రయాణాలను వాయిదా వేసుకోవాలని చెబుతున్నారు. నగరంలోకి వెళ్లాల్సిన వారు ట్రాఫిక్‌ పరిస్థితులను తెలుసుకుని ప్రత్యామ్నాయ మార్గాలను ఎంచుకోవాలని సూచిస్తున్నారు. వాహనదారులు, ప్రయాణికులు పోలీసుల సూచనలను పాటించి ట్రాఫిక్‌ నియంత్రణకు సహకరించాలని అధికారులు కోరుతున్నారు.