D Spiritual: Dec 8: హిందూ మతంలో వాస్తు శాస్త్రానికి ప్రత్యేకమైన ప్రాముఖ్యత ఉంది. ఇంటి నిర్మాణం, ఇంట్లోని వస్తువుల అమరికలతో పాటు, ఇంటి ఆవరణలో నాటే మొక్కల విషయంలో కూడా వాస్తు అనేక నియమాలను సూచిస్తోంది. చాలామంది తమ ఇంట్లో లేదా బాల్కనీలో ఇష్టపడి మొక్కలను పెంచుకుంటారు. అయితే వాస్తు ప్రకారం సరైన దిశలో, సరైన రీతిలో మొక్కలను పెంచకపోతే ఇంట్లో నివసించే వారికి కష్టాలు, నష్టాలు కలుగుతాయని నిపుణులు చెబుతున్నారు.
ఇంటి ఇతర వస్తువులకు ఎలా నిర్ణీత స్థానం ఉండాలో, మొక్కలను నాటడానికి కూడా నిర్దిష్ట స్థానం అవసరమని వాస్తు శాస్త్రం పేర్కొంటుంది. చెట్లు మరియు మొక్కలను సరైన దిశలో నాటితే ఇంట్లో సుఖశాంతులు పెరుగుతాయని, లక్ష్మీదేవి అనుగ్రహం లభిస్తుందని విశ్వాసం. ఈ నేపథ్యంలో, నిత్యవసర వంటల్లో విరివిగా ఉపయోగించే ఔషధ గుణాలు ఉన్న కరివేపాకు మొక్కను ఎక్కడ నాటితే శుభఫలితాలు వస్తాయో తెలుసుకోవడం ముఖ్యము.
కరివేపాకు మొక్కను నాటడానికి అత్యంత అనుకూలమైనది ఇంటి పడమర దిశ. ఈ దిశను చంద్రుడి దిశగా పరిగణిస్తారు. ఇక్కడ ఈ మొక్కను పెంచడం వలన ఇంటిలో పాజిటివ్ ఎనర్జీ పెరుగుతుందని, నెగెటివ్ ఎనర్జీ తగ్గుతుందని నమ్మకం ఉంది. అయితే కరివేపాకు మొక్క ఉండే ప్రదేశంలో మురికి నీరు చేరకుండా చూసుకోవాలి. సింక్ల నుంచి వచ్చే వృధా నీరు పోయే ప్రదేశంలో ఈ మొక్కను ఎట్టి పరిస్థితుల్లోనూ నాటకూడదు.
మొక్క ఆరోగ్యంగా పెరగాలంటే చీడలు పట్టకుండా జాగ్రత్తలు తీసుకోవాలి. గొంగళి పురుగులు లేదా ఇతర చీడల వల్ల మొక్క దెబ్బతినకుండా క్రమం తప్పకుండా పరిశీలించాలి. ఎక్కడైనా చీడ పట్టినట్లు కనిపిస్తే ఆ భాగాన్ని వెంటనే తొలగించడం ఉత్తమం. ఎందుకంటే ఇంట్లో కరివేపాకు చెట్టు ఎండిపోతే లేదా చీడలతో దెబ్బతింటే, అది కుటుంబ సభ్యులపై ప్రతికూల ప్రభావం చూపుతుందని విశ్వసిస్తారు. దీనివల్ల ఇంట్లో గొడవలు, అసహజ వాతావరణం ఏర్పడే అవకాశం ఉందని భావిస్తారు.
కరివేపాకు చెట్టును పెంచే ప్రాంతంలో కొన్ని చెట్లను దగ్గరగా పెట్టరాదని కూడా వాస్తు పేర్కొంటుంది. ముఖ్యంగా చింత చెట్టును కరివేపాకు చెట్టు పక్కనే నాటడం శుభకరం కాదని చెబుతారు. దీనివల్ల ఆర్థిక ప్రగతి మందగించవచ్చని నమ్మకం ఉంది.