D Spiritual: Mar 14: నరదిష్టి అనేది ఒక వ్యక్తి చూపుకు ఒక ప్రత్యేకమైన శక్తి ఉంటుందని, ముఖ్యంగా అసూయ లేదా ఈర్ష్యతో కూడిన దృష్టి ప్రతికూల ప్రభావాలను కలిగిస్తుందని భావించే సంప్రదాయ నమ్మకం. ఈ ప్రతికూల ప్రభావాన్నే సాధారణంగా “నరదిష్టి” లేదా “నరఘోష” అని పిలుస్తారు. ఈ దృష్టి వల్ల మనుషులు, జంతువులు లేదా వస్తువులపై ప్రతికూల ప్రభావం పడుతుందని చాలామంది నమ్ముతారు.
నరదిష్టి తగిలిందని గుర్తించడానికి కొన్ని సంకేతాలు ఉన్నాయని చెబుతారు. చిన్నపిల్లల విషయంలో వారు కారణం లేకుండా ఎక్కువగా ఏడవడం, ముందుగా ఆరోగ్యంగా ఉన్న పిల్లలు ఒక్కసారిగా బలహీనంగా మారడం లేదా సంతోషంగా ఉండే వారు అకస్మాత్తుగా విచారంగా మారడం వంటి పరిస్థితులను కొందరు దిష్టి ప్రభావంగా భావిస్తారు.
అలాగే బాగా పూసే, ఫలాలు కాసే చెట్లు అకస్మాత్తుగా వాడిపోవడం లేదా ఒకట్రెండు రోజుల్లోనే జీవం లేనట్టుగా మారడం కూడా దిష్టి ప్రభావంగా చెబుతారు. పాలిచ్చే ఆవులు లేదా గేదెలు ఎటువంటి అనారోగ్యం లేకుండానే పాలు ఇవ్వడం ఆపివేయడం, తమ దూడలకు కూడా పాలు ఇవ్వకపోవడం వంటి సంఘటనలను కూడా దిష్టి దోషానికి కారణమని భావిస్తారు. ఇంటి ముందు కట్టే బూడిద గుమ్మడికాయ అకస్మాత్తుగా కుళ్లిపోవడం కూడా దిష్టి ప్రభావంగా పరిగణిస్తారు. సాధారణంగా గుమ్మడికాయ ఎండిపోవాలి గానీ, త్వరగా కుళ్లిపోవడం అసాధారణంగా భావిస్తారు.
డాక్టర్ అనంత లక్ష్మి ప్రకారం, నేటి కాలంలో పిల్లల ఫోటోలను సామాజిక మాధ్యమాల్లో ఎక్కువగా పంచుకోవడం వల్ల కూడా నరదిష్టి తగులుతుందని కొందరు నమ్ముతారు. ఇతరుల అసూయ లేదా ఈర్ష్యతో కూడిన చూపు ఆ ఫోటోల ద్వారా పిల్లలపై పడే అవకాశం ఉందని ఆమె హెచ్చరించారు. అందువల్ల పిల్లలు, ఆస్తులు లేదా ప్రతిభ వంటి విలువైన విషయాలను ఇతరుల ముందు ఎక్కువగా ప్రదర్శించకుండా ఉండటం కూడా దిష్టి నివారణకు ఒక మార్గమని చెబుతారు.
నరదిష్టి తగిలినప్పుడు దానిని తొలగించేందుకు పలు సంప్రదాయ పద్ధతులు ఉన్నాయి. వాటిలో ఉప్పుతో దిష్టి తీయడం ఒకటి. రాళ్ల ఉప్పును ఉపయోగించి పిల్లల చుట్టూ మూడు సార్లు తిప్పి నీటిలో వేయడం చేస్తారు. ఉప్పుకు ప్రతికూల శక్తిని ఆకర్షించే లక్షణం ఉందని, ఇంటి గుమ్మం వద్ద ఉప్పు ఉంచడం ద్వారా కూడా నెగిటివిటీని దూరం చేయవచ్చని నమ్ముతారు. అయితే ఆ ఉప్పును బయట పడేయకుండా ఫ్లష్ చేయాలని సూచిస్తారు.
నల్ల తాడు లేదా దారం కట్టుకోవడం కూడా దిష్టి నుండి రక్షణగా భావిస్తారు. అలాగే పిల్లలు లేదా పెళ్లి కూతురు, పెళ్లికొడుకులకు బుగ్గపై నల్ల దిష్టి చుక్క పెట్టడం ద్వారా ఇతరుల చెడు దృష్టిని మళ్లించవచ్చని అంటారు.
ఇంటి ముందు బూడిద గుమ్మడికాయ కట్టడం కూడా ఒక సంప్రదాయ పద్ధతి. గుమ్మడికాయ దిష్టిని తనవైపు ఆకర్షించి ఇంటిని రక్షిస్తుందని నమ్మకం. సాధారణంగా అది ఎండిపోవాలి కానీ ఎక్కువ దిష్టి ప్రభావం ఉంటే కుళ్లిపోతుందని చెబుతారు.
ఇతర పద్ధతులలో ఎర్రనీళ్లతో దిష్టి తీయడం, కొబ్బరికాయపై కర్పూరం పెట్టి దిష్టి తీయడం, ఎండుమిరపకాయలను నిప్పులో వేయడం, నూనె గుడ్డతో దిష్టి తీసి వెలిగించడం వంటి అనేక సంప్రదాయ విధానాలు ఉన్నాయి. ఇవన్నీ ప్రధానంగా పూర్వకాలం నుంచి వస్తున్న విశ్వాసాలపై ఆధారపడిన పద్ధతులేనని, అయినప్పటికీ చాలా మంది ఇవి ఆచరిస్తూ ఫలితాలు పొందుతున్నారని డాక్టర్ అనంత లక్ష్మి తెలిపారు.