DNews: విద్య ద్వారానే సమాజంలో సమగ్ర అభివృద్ధి సాధ్యమని తెలంగాణ ఉప ముఖ్యమంత్రి, ఆర్థిక శాఖ మంత్రి మల్లు భట్టి విక్రమార్క అన్నారు. రాష్ట్రంలోని ప్రతి చిన్నారికి నాణ్యమైన విద్య అందించడమే ప్రభుత్వ లక్ష్యమని స్పష్టం చేశారు. ఈ క్రమంలో వరంగల్ పశ్చిమ నియోజకవర్గంలోని కాజీపేటలో రూ.10 కోట్ల వ్యయంతో నిర్మించనున్న తెలంగాణ పబ్లిక్ స్కూల్‌కు బుధవారం ఆయన శంకుస్థాపన చేశారు. ఎమ్మెల్యే నాయిని రాజేందర్ రెడ్డి ప్రత్యేక చొరవతో ప్రభుత్వ బాలుర ఉన్నత పాఠశాల ప్రాంగణంలో ఈ కార్యక్రమం నిర్వహించారు.
విద్యారంగానికి ప్రభుత్వం పెద్దపీట
ఈ సందర్భంగా భట్టి విక్రమార్క మాట్లాడుతూ ముఖ్యమంత్రి రేవంత్ రెడ్డి నాయకత్వంలోని ప్రభుత్వం విద్యారంగంలో కీలక సంస్కరణలు చేపడుతోందన్నారు. ప్రతి విద్యార్థికి సమాన అవకాశాలు కల్పించి ప్రపంచస్థాయిలో పోటీపడేలా తీర్చిదిద్దడమే లక్ష్యమని తెలిపారు.
105 యంగ్ ఇండియా స్కూళ్ల ఏర్పాటు
రాష్ట్రవ్యాప్తంగా 105 యంగ్ ఇండియా ఇంటిగ్రేటెడ్ రెసిడెన్షియల్ స్కూళ్లకు ప్రభుత్వం అనుమతులు మంజూరు చేసిందని భట్టి వెల్లడించారు. అంతర్జాతీయ ప్రమాణాలతో ఒక్కో పాఠశాలను 20 నుంచి 25 ఎకరాల్లో నిర్మించనున్నట్లు తెలిపారు. ఎస్సీ, ఎస్టీ, బీసీ, మైనారిటీ, ఓసీ విద్యార్థులందరూ ఒకే ప్రాంగణంలో చదువుకునేలా ఏర్పాట్లు చేస్తున్నామన్నారు.
ప్రతి నియోజకవర్గంలో తెలంగాణ పబ్లిక్ స్కూల్
ప్రతి అసెంబ్లీ నియోజకవర్గంలో ఒక తెలంగాణ పబ్లిక్ స్కూల్ ఏర్పాటు చేయాలని ప్రభుత్వం నిర్ణయించిందని తెలిపారు. ప్రీ ప్రైమరీ నుంచి 12వ తరగతి వరకు ఇంగ్లీష్ మీడియంలో విద్య అందించనున్నట్లు చెప్పారు. డిజిటల్ తరగతులు, ఆధునిక బోధన, రవాణా సదుపాయాలతో పాటు విద్యార్థులకు యూనిఫామ్‌లు, షూస్, పుస్తకాలు, బ్యాగులు ఉచితంగా అందిస్తామని వివరించారు.
విద్యార్థులకు అల్పాహారం, మధ్యాహ్న భోజనం
తెలంగాణ పబ్లిక్ స్కూళ్లను సెమీ రెసిడెన్షియల్ విధానంలో నిర్వహించనున్నట్లు భట్టి విక్రమార్క తెలిపారు. విద్యార్థులకు పాఠశాలల్లోనే ఉదయం అల్పాహారం, మధ్యాహ్న భోజనం అందిస్తామన్నారు. పౌష్టికాహారంలో భాగంగా పాలు, రాగిజావ కూడా అందించేలా చర్యలు తీసుకుంటున్నామని చెప్పారు.
పాఠశాల ముగిసిన తర్వాత ప్రభుత్వ రవాణా ద్వారా విద్యార్థులను ఇళ్లకు చేర్చుతామని తెలిపారు. పిల్లలు నాణ్యమైన విద్య పొందడంతో పాటు కుటుంబ సభ్యులతో సమయం గడిపేలా ఈ విధానాన్ని రూపొందించామన్నారు.
ప్రభుత్వ పాఠశాలల్లో 27 లక్షల మంది విద్యార్థులకు ప్రయోజనం
రాష్ట్రంలోని ప్రభుత్వ పాఠశాలల్లో చదువుతున్న సుమారు 27 లక్షల మంది విద్యార్థులకు ఉదయం అల్పాహార పథకాన్ని ప్రారంభించినట్లు ఉప ముఖ్యమంత్రి వెల్లడించారు. పేద, మధ్యతరగతి కుటుంబాల పిల్లలకు మెరుగైన విద్య, పౌష్టికాహారం అందించడమే ప్రభుత్వ ఉద్దేశమన్నారు.
ఈ కార్యక్రమంలో ఎంపీ కడియం కావ్య, ఎమ్మెల్సీ బస్వరాజు సారయ్య, ఎమ్మెల్యే కేఆర్ నాగరాజు, ఇతర ప్రజాప్రతినిధులు, జిల్లా కలెక్టర్ చాహత్ బాజ్ పాయ్, అధికారులు, కాంగ్రెస్ నాయకులు పాల్గొన్నారు.