D Spiritual: Nov 28: చాలామంది దేవుడికి పూజ చేసేటప్పుడు తెలిసినా తెలియక చిన్న చిన్న పొరపాట్లు చేస్తుంటారు. ఈ పొరపాట్ల వల్ల పూజ ఫలితం తగ్గడమే కాకుండా అనేక సమస్యలు ఎదురుకావచ్చని పండితులు చెబుతున్నారు. కొంతమంది నిత్యం దీపారాధన చేస్తే, మరికొందరు వారంలో కొన్ని రోజులు మాత్రమే దీపం వెలిగిస్తారు. అయితే దీపారాధన సమయంలో కూడా చాలామంది తెలియక కొన్ని తప్పులు చేస్తారు. ఇవి పూజ ఫలితాన్ని తగ్గిస్తాయని భావన ఉంది.
పూజలో దేవునికి సమర్పించే నైవేద్యం చాలా స్వచ్ఛంగా మరియు శుభ్రంగా ఉండాలి. నైవేద్యం ఎప్పుడూ సాత్విక ఆహారమే కావాలి. అలాగే నైవేద్యం తయారు చేసే సమయంలో వంటగది పూర్తిగా శుభ్రంగా ఉండాలి. అలాగే పూజ కోసం ఆహారం సిద్ధం చేసే వ్యక్తి కూడా శుభ్రంగా ఉండటం అవసరం. స్నానం చేసి, శుభ్రమైన దుస్తులు ధరించి నైవేద్యాన్ని సిద్ధం చేయడం శ్రేయస్కరం.
ప్రసాదం తయారు చేసిన వారు స్వయంగా దేవుడికి నైవేద్యం సమర్పించడం మంచిదని చెబుతారు. నైవేద్యం తయారు చేసే పాత్ర కూడా చాలా ముఖ్యమైనది. బంగారం, వెండి, రాగి లేదా ఇత్తడి పాత్రలు ఉత్తమం. అవసరమైతే మట్టి లేదా చెక్క పాత్రలను కూడా ఉపయోగించవచ్చు. కానీ అల్యూమినియం, ఇనుము, స్టీల్ లేదా ప్లాస్టిక్ పాత్రల్లో నైవేద్యం పెట్టకూడదని సూచిస్తున్నారు.
నైవేద్యం సమర్పించిన తర్వాత దానిని ఆలయంలో ఎక్కువసేపు ఉంచకూడదు. వెంటనే కుటుంబ సభ్యులకు పంచడం శ్రేయస్కరం. దీపం వెలిగించేటప్పుడు కూడా కొన్ని నియమాలు ఉన్నాయి. ముందుగా వత్తి పెట్టి తర్వాత నూనె పోయకూడదు. ముందుగా నూనె పోసి, తర్వాత రెండు లేదా అంతకంటే ఎక్కువ వత్తులు కలిపి వేయాలి. సాధారణ నూనెతో పాటు అప్పుడప్పుడు ఆవు నెయ్యి, నువ్వుల నూనె, కొబ్బరి నూనె వంటి వాటిని ఉపయోగించి దీపారాధన చేస్తే మరింత శుభఫలితాలు లభిస్తాయని చెబుతున్నారు.