D News: Jul 13: రుద్రంగిలో ఘనంగా జెట్టక్క ఉత్సవం.. సంప్రదాయ ఆచారాలతో గ్రామంలో పండుగ సందడి
రాజన్న సిరిసిల్ల జిల్లా రుద్రంగి మండల కేంద్రంలో తరతరాలుగా నిర్వహిస్తున్న సాంప్రదాయ జెట్టక్క ఉత్సవం భక్తిశ్రద్ధల మధ్య ఘనంగా జరిగింది. గ్రామంలో దరిద్రం, అశుభాలు తొలగిపోయి లక్ష్మీదేవి అనుగ్రహంతో ఐశ్వర్యం, సిరిసంపదలు వెల్లివిరియాలనే ఆకాంక్షతో గ్రామస్తులు ప్రత్యేక పూజలు నిర్వహించారు.
ఉదయం నుంచి గ్రామ ప్రజలు ఇళ్లలోని పాత చీపుర్లు, పనికిరాని వస్తువులను సేకరించి డప్పు చప్పుళ్లు, హారతులు, సంప్రదాయ నృత్యాల నడుమ ఊరేగింపుగా గ్రామ శివారు వరకు తీసుకెళ్లారు. ఈ ఆచారం ద్వారా దరిద్ర దేవత గ్రామాన్ని విడిచి వెళ్లి, సంపద, శుభాలు గ్రామంలోకి వస్తాయని స్థానికులు విశ్వసిస్తారు.
ఉత్సవం సందర్భంగా వివిధ కుల సంఘాల ఆధ్వర్యంలో ప్రత్యేక పూజలు నిర్వహించారు. ఈ ఏడాది సమృద్ధిగా వర్షాలు కురిసి రైతులకు మంచి పంటలు పండాలని, గ్రామంలో సుఖశాంతులు నెలకొనాలని గ్రామ పెద్దలు, రైతులు, మహిళలు సామూహికంగా ప్రార్థనలు చేశారు.
గ్రామ యువత, మహిళలు, చిన్నారులు పెద్ద సంఖ్యలో పాల్గొని ఉత్సవాన్ని విజయవంతం చేశారు. ఆధునిక కాలంలోనూ పూర్వీకుల సంప్రదాయాన్ని కొనసాగించడం ఆనందంగా ఉందని గ్రామస్తులు తెలిపారు. జెట్టక్క ఉత్సవంతో రుద్రంగి గ్రామమంతా భక్తి, సంప్రదాయం, ఐక్యతను ప్రతిబింబిస్తూ పండుగ వాతావరణంలో మునిగిపోయింది.