DSports 14 Nov:రాజ్‌కోట్ వేదికగా దక్షిణాఫ్రికా ‘ఏ’ జట్టుతో జరిగిన తొలి అనధికారిక వన్డే మ్యాచ్‌లో టీమిండియా ఓపెనర్ రుతురాజ్ గైక్వాడ్ (Ruturaj Gaikwad) సెంచరీతో చెలరేగి, జట్టుకు నాలుగు వికెట్ల తేడాతో అద్భుత విజయాన్ని అందించాడు. ఈ గెలుపుతో భారత్-ఏ జట్టు మూడు మ్యాచ్‌ల సిరీస్‌లో 1-0 ఆధిక్యంలో నిలిచింది.
టాస్ గెలిచి మొదట బ్యాటింగ్ చేసిన దక్షిణాఫ్రికా ‘ఏ’ జట్టు, ఒకానొక దశలో 53 పరుగులకే 5 వికెట్లు కోల్పోయి కష్టాల్లో పడింది. అయితే, ఆ తర్వాత డెలనో పోట్‌గీటర్ (90), డియాన్ ఫారెస్టర్ (77), బిజోర్న్ ఫార్టూయిన్ (59)ల అద్భుత పోరాటంతో నిర్ణీత 50 ఓవర్లలో 9 వికెట్ల నష్టానికి 285 పరుగుల భారీ స్కోరు చేసింది. భారత బౌలర్లలో అర్ష్‌దీప్‌ సింగ్ మరియు హర్షిత్ రాణా చెరో రెండు వికెట్లు తీశారు.
అనంతరం 286 పరుగుల లక్ష్యంతో బరిలోకి దిగిన భారత్-ఏ జట్టుకు ఓపెనర్ రుతురాజ్ గైక్వాడ్ సుదీర్ఘమైన, కీలకమైన ఇన్నింగ్స్‌తో అండగా నిలిచాడు. రుతురాజ్ 129 బంతుల్లో 12 ఫోర్లతో 117 పరుగులు చేసి, తన 17వ లిస్ట్-ఏ సెంచరీని పూర్తి చేసుకున్నాడు. ఓవైపు వికెట్లు పడుతున్నా, కెప్టెన్ తిలక్ వర్మ (39), నితీశ్ కుమార్ రెడ్డి (37), నిశాంత్ సింధు (29 నాటౌట్) తో విలువైన భాగస్వామ్యాలు నెలకొల్పి లక్ష్యాన్ని ఛేదించే దిశగా తీసుకెళ్లాడు. చివరి ఓవర్లలో నితీశ్ రెడ్డి, సింధుల సహకారంతో భారత్-ఏ జట్టు 49.3 ఓవర్లలోనే 6 వికెట్లు కోల్పోయి లక్ష్యాన్ని అందుకుంది.
రుతురాజ్ సెంచరీ కారణంగా భారత్-ఏ జట్టు సాధించిన ఈ ఘన విజయం అతనికి మళ్లీ సీనియర్ జట్టులో చోటు దక్కించుకోవడానికి మరింత బలాన్నిస్తుంది.