బియ్యం ధరలకు రెక్కలు.. సామాన్యుడికి చుక్కలు

D News: Jul 28: ఆంధ్రప్రదేశ్‌లో బియ్యం ధరలు రోజురోజుకూ పెరుగుతుండటంతో పేద, మధ్యతరగతి కుటుంబాలపై ఆర్థిక భారం అధికమవుతోంది. మార్కెట్‌లో కిలో బియ్యం ధరలు ఒక్కసారిగా ₹5 నుంచి ₹12 వరకు పెరగగా, గత నెలతో పోలిస్తే 25 కిలోల బస్తా ధర ₹200 నుంచి ₹300 వరకు పెరిగింది.

పల్నాడు ప్రాంతంలో పండే ధాన్యం తమిళనాడు, కేరళ రాష్ట్రాలకు భారీగా ఎగుమతి కావడం, వర్షాభావ పరిస్థితులపై ఉన్న అంచనాల నేపథ్యంలో వ్యాపారులు నిల్వలను పెంచుకోవడం ధరల పెరుగుదలకు ప్రధాన కారణాలుగా చెబుతున్నారు. ప్రభుత్వ శాఖల పర్యవేక్షణ లోపించడం వల్ల కొందరు వ్యాపారులు కృత్రిమ కొరత సృష్టించి అధిక లాభాలు పొందుతున్నారనే విమర్శలు కూడా వినిపిస్తున్నాయి.

ప్రస్తుతం బిపిటి, సోనామసూరి వంటి ప్రముఖ బియ్యం రకాల ధరలు గణనీయంగా పెరిగాయి. దీంతో నిత్యావసర వస్తువుల కొనుగోలే సామాన్య ప్రజలకు భారంగా మారింది.

మార్కెట్‌లో వివిధ రకాల బియ్యం ధరలు

పల్నాడు జిల్లా మార్కెట్‌లో గత నెలతో పోలిస్తే ఈ నెల బియ్యం ధరలు భారీగా పెరిగాయి. గత నెలలో ₹4,400 ఉన్న బిపిటి 25 కిలోల బస్తా ధర ప్రస్తుతం ₹5,400కు చేరుకుంది. రెండు నెలల క్రితం కిలోకు ₹55 ఉన్న బిపిటి బియ్యం ఇప్పుడు ₹60 నుంచి ₹65 మధ్య విక్రయమవుతోంది.

సోనామసూరి 25 కిలోల బస్తా ధర ₹5,000 నుంచి ₹6,400కు పెరిగింది. జేజేఎల్ రకం బస్తా ధర ₹5,000 నుంచి ₹6,200కు చేరుకోగా, హెచ్‌ఎంటీ రకం బస్తా ధర ₹5,500 నుంచి ₹6,600కు పెరిగింది. ఈ ధరల పెరుగుదలతో కుటుంబాల నెలవారీ ఆహార వ్యయం గణనీయంగా పెరిగిందని వినియోగదారులు ఆందోళన వ్యక్తం చేస్తున్నారు.

ధరల నియంత్రణకు ప్రభుత్వ చర్యలు

పెరుగుతున్న బియ్యం ధరల నుంచి ప్రజలకు ఉపశమనం కల్పించేందుకు ప్రభుత్వం ప్రత్యేక చర్యలు చేపట్టింది. ఆగస్టు 1వ తేదీ నుంచి రైతు బజార్లు, రైస్ మిల్లుల వద్ద ప్రత్యేక విక్రయ కేంద్రాలు ఏర్పాటు చేయాలని నిర్ణయించింది. ఈ కేంద్రాల్లో తక్కువ ధరలకు నాణ్యమైన బియ్యాన్ని అందుబాటులో ఉంచనున్నారు.

ప్రభుత్వం ప్రకటించిన ధరల ప్రకారం బిపిటి, కెఎన్‌ఎం స్టీమ్ బియ్యం కిలోను ₹52కు, ముడి బియ్యం కిలోను ₹50కు, గ్రేడ్-2 బియ్యం కిలోను ₹42కు విక్రయించనున్నారు. ఈ రాయితీ విక్రయాల ద్వారా పేద, మధ్యతరగతి కుటుంబాలకు కొంత ఉపశమనం లభించే అవకాశం ఉందని అధికారులు భావిస్తున్నారు.

మార్కెట్‌లో అక్రమ నిల్వలు, కృత్రిమ కొరతను అరికట్టేందుకు అధికార యంత్రాంగం కట్టుదిట్టమైన నిఘా చేపట్టాలని ప్రజలు కోరుతున్నారు. ధరలను నియంత్రించేందుకు ప్రభుత్వం చేపడుతున్న చర్యలు ఎంత మేర ఫలిస్తాయో వేచి చూడాల్సి ఉంది.