D Spiritual: Dec 22: తెలంగాణ రాష్ట్రంలోని ప్రముఖ పుణ్యక్షేత్రమైన కొండగట్టు శ్రీ ఆంజనేయస్వామి వారి ఆలయ అభివృద్ధి పనుల కోసం తిరుమల తిరుపతి దేవస్థానం కీలక నిర్ణయం తీసుకుంది. ఆలయ అభివృద్ధి కార్యక్రమాలకు రూ.35.19 కోట్ల నిధులను మంజూరు చేసిన విషయం తెలిసిందే. ఈ నిర్ణయం కొండగట్టు క్షేత్రానికి మరింత ప్రాధాన్యతను తీసుకొచ్చిందని భక్తులు హర్షం వ్యక్తం చేస్తున్నారు.
ఈ నేపథ్యంలో ముఖ్యమంత్రి చంద్రబాబుకు టీటీడీ ఛైర్మన్ పవన్ కల్యాణ్ ఎక్స్ వేదికగా కృతజ్ఞతలు తెలిపారు. సార్వత్రిక ఎన్నికల అనంతరం తన ఇలవేల్పు అయిన శ్రీ ఆంజనేయస్వామికి మొక్కులు చెల్లించుకునేందుకు కొండగట్టు క్షేత్రాన్ని దర్శించుకున్నట్లు ఆయన వెల్లడించారు. ఆ సందర్భంగా ఆలయంలో భక్తులకు అవసరమైన మౌలిక సదుపాయాలపై పలువురు వినతులు అందజేశారని పేర్కొన్నారు.
భక్తుల అవసరాలను దృష్టిలో ఉంచుకుని ఆలయ అభివృద్ధి పనుల కోసం తాను టీటీడీకి ప్రతిపాదనలు పంపినట్లు పవన్ కల్యాణ్ తెలిపారు. వాటిని పరిశీలించిన టీటీడీ, సమగ్ర అభివృద్ధి ప్రణాళికకు ఆమోదం తెలుపుతూ అవసరమైన నిధులను మంజూరు చేసిందని ఆయన వివరించారు.
మంజూరైన నిధులతో భక్తుల సౌకర్యార్థం పలు కీలక నిర్మాణ పనులు చేపట్టనున్నట్లు తెలిపారు. ఇందులో దీక్ష విరమణ మంటపం నిర్మాణంతో పాటు, భక్తులు బస చేసేందుకు 96 గదులతో కూడిన భారీ సత్రం నిర్మాణం కూడా చేపట్టనున్నారు. ఈ అభివృద్ధి పనులు పూర్తయితే కొండగట్టు క్షేత్రానికి వచ్చే భక్తులకు మరింత సౌకర్యం కలుగుతుందని భావిస్తున్నారు.
ఈ సందర్భంగా నిధులు మంజూరు చేసిన టీటీడీ ఛైర్మన్ బి.ఆర్. నాయుడు, పాలక మండలి సభ్యులు, టీటీడీ ఈవో, అడిషనల్ ఈవో, జేఈవోలకు పవన్ కల్యాణ్ ప్రత్యేకంగా కృతజ్ఞతలు తెలిపారు. కొండగట్టు ఆలయ అభివృద్ధికి సహకరించిన అందరికీ ధన్యవాదాలు తెలిపారు.