విదేశాల్లో కొలువుల పేరుతో నిరుద్యోగులకు దళారుల టోకరా
నకిలీ వీసాలు, పత్రాలతో మోసాలు.. ఇమ్మిగ్రేషన్‌ అధికారుల సహకారంపైనా ఆరోపణలు
హైదరాబాద్‌: విదేశాల్లో ఉద్యోగాలు ఇప్పిస్తామంటూ నిరుద్యోగులు, పేదలను లక్ష్యంగా చేసుకుని కొందరు ఏజెంట్లు మోసాలకు పాల్పడుతున్నారు. మంచి జీతం, మెరుగైన జీవితం, ఆర్థిక ఇబ్బందుల నుంచి విముక్తి అంటూ ఆశలు కల్పించి లక్షల రూపాయలు వసూలు చేస్తున్నారు. చివరకు నకిలీ వీసాలు, పత్రాలు చేతికిచ్చి బాధితులను ఇబ్బందుల్లోకి నెడుతున్నారు.
నిజామాబాద్‌కు చెందిన ఇద్దరు కార్మికులకు సౌదీ అరేబియాలో ఉద్యోగాలు ఇప్పిస్తామంటూ ఏజెంట్లు రూ.3 లక్షలు వసూలు చేశారు. అయితే వారికి టూరిస్ట్‌ వీసాలు ఇచ్చి పంపించారు. శంషాబాద్‌ విమానాశ్రయంలో ఇమ్మిగ్రేషన్‌ తనిఖీల సమయంలో ఈ విషయం బయటపడటంతో వారు పట్టుబడ్డారు. ఆంధ్రప్రదేశ్‌లోని పలు జిల్లాలకు చెందిన 50 మంది మహిళలు దుబాయ్‌ వెళ్లేందుకు వచ్చి ఇమ్మిగ్రేషన్‌ అధికారులకు చిక్కారు. ఇవి కేవలం కొన్ని ఉదాహరణలు మాత్రమే.
తాజాగా నకిలీ పత్రాలు, ఫోర్జరీ సంతకాలతో విదేశాలకు వెళ్లేందుకు ప్రయత్నించిన ఓ వ్యక్తిని ఆర్‌జీఐఏ పోలీసులు అదుపులోకి తీసుకున్నారు. అతడికి నకిలీ పత్రాలు అందించిన నలుగురిపై కేసు నమోదు చేశారు.
అసలు సూత్రధారులెక్కడ?
విదేశాల్లో ఉన్నత చదువులు, ఉద్యోగాలు.. తక్కువ సమయంలోనే అప్పులు తీర్చుకోవచ్చనే ఆశలు చూపుతూ నకిలీ కన్సల్టెన్సీలు విద్యార్థులు, నిరుద్యోగులను వలలో వేసుకుంటున్నాయి. రూ.లక్ష ఇస్తే చాలు.. దుబాయ్‌ పంపిస్తామని, రెండేళ్లలో సంపాదించిన డబ్బుతో సొంతూరిలో కుటుంబంతో సంతోషంగా గడపవచ్చని దళారులు నమ్మిస్తున్నారు. వీరి మాటలు నమ్మి వేలాది మంది పేదలు మోసపోతున్నారు. బాధితుల్లో ఎక్కువమంది మహిళలే ఉంటున్నట్టు తెలుస్తోంది.
ఈ ఏడాది పది నెలల వ్యవధిలోనే 200 మందికి పైగా బాధితులు ఈ మోసాల బారినపడి సుమారు రూ.20 కోట్లు నష్టపోయినట్టు అంచనా. ఏజెంట్లు తమ అసలు వివరాలు బయటపడకుండా జాగ్రత్తలు తీసుకుంటున్నారు. తెరవెనుక ఉన్న సూత్రధారుల సూచనలతో ఆంధ్రప్రదేశ్‌, తెలంగాణల్లోని పేదలు, యువతకు ఉద్యోగాల ఆశ చూపి లక్షల రూపాయలు వసూలు చేస్తున్నారు.
నకిలీ పేర్లతో తీసుకున్న సిమ్‌ కార్డులను ఉపయోగిస్తున్నారు. ఆన్‌లైన్‌ లావాదేవీల ద్వారా డబ్బు తీసుకుంటే సులభంగా పట్టుబడే అవకాశం ఉండటంతో నగదు రూపంలోనే వసూళ్లు చేస్తున్నట్టు గుర్తించారు. వరుస ఘటనల నేపథ్యంలో అప్రమత్తమైన హైదరాబాద్‌ సీసీఎస్‌ పోలీసులు వీసా మోసాలపై లోతుగా దర్యాప్తు చేస్తున్నారు. ఈ వ్యవహారాల్లో అసలు సూత్రధారులు ఎవరు? వారికి ఇమ్మిగ్రేషన్‌ సిబ్బంది నుంచి ఏమైనా సహకారం అందుతోందా? అనే కోణాల్లోనూ విచారణ చేపట్టారు. ప్రధాన నిందితుల కోసం గాలిస్తున్నారు. ఆంధ్రప్రదేశ్‌, తెలంగాణకు చెందిన నలుగురు నిందితులపై లుకౌట్‌ నోటీసులు జారీ చేశారు.
అమెరికా, ఆస్ట్రేలియా ఉద్యోగాల పేరుతోనూ మోసాలు
అమెరికాలో చదువులు, ఉద్యోగాలంటూ రూ.20 లక్షలు వసూలు
అమెరికాలో ఎంఎస్‌ చదివేందుకు అవకాశం కల్పిస్తామని, కోర్సు పూర్తయిన వెంటనే ఉద్యోగం ఇప్పిస్తామని ఓ ప్రైవేటు ఉద్యోగి కుమారుడిని ఏజెంట్లు నమ్మించారు. పాస్‌పోర్టు, వీసా ఏర్పాట్ల బాధ్యత కూడా తమదేనని చెప్పి అతడి నుంచి రూ.20 లక్షలు వసూలు చేశారు. అయితే అమెరికా వెళ్లిన తర్వాత పాస్‌పోర్టు, వీసా పత్రాలు నకిలీవని తేలడంతో ఆ యువకుడు తీవ్ర మనోవేదనకు గురయ్యాడు.
ఆస్ట్రేలియాలో ఉద్యోగాల పేరుతో రూ.2 కోట్లకు పైగా టోకరా
ఆస్ట్రేలియాలో ఉద్యోగాలు ఇప్పిస్తామంటూ ఓ కన్సల్టెన్సీ నిర్వాహకులు 30 మంది నుంచి రూ.2 కోట్లకు పైగా వసూలు చేశారు. అక్కడి కంపెనీల నుంచి ఉద్యోగ ఆఫర్లు వచ్చినట్టుగా నకిలీ పత్రాలను బాధితులకు పంపించారు. వాటిపై అనుమానం వచ్చిన కొందరు ఉద్యోగార్థులు స్వయంగా వివరాలు తెలుసుకునే ప్రయత్నం చేయడంతో మోసం బయటపడింది. తాము మోసపోయినట్టు గుర్తించిన బాధితులు పోలీసులను ఆశ్రయించారు.
విదేశీ ఉద్యోగాల పేరుతో వచ్చే ప్రకటనలు, ఏజెంట్ల హామీలను గుడ్డిగా నమ్మకుండా వీసా, ఉద్యోగ ఆఫర్‌, కన్సల్టెన్సీ వివరాలను ముందుగానే ధ్రువీకరించుకోవాల్సిన అవసరం ఉందని ఈ ఘటనలు హెచ్చరిస్తున్నాయి.