పండగలు, వ్రతాల సమయంలోనే కాదు నెలలో ఈ ఐదు రోజులు కూడా ఉల్లి, వెల్లుల్లి తినొద్దు ఎందుకంటే..

D Spiritual: Dec 6: హిందూ మతంలో ఉల్లిపాయలు, వెల్లుల్లిని తామసిక ఆహారం గా పరిగణిస్తారు. ముఖ్యమైన పండగలు, పూజల సమయంలో ఈ ఆహారాలను తినడం నిషేధం. సనాతన ధర్మ విశ్వాసాల ప్రకారం పండగలు, వ్రతాలు, పూజ సమయంలో మాత్రమే కాదు, నెలలో 5 రోజులు కూడా వెల్లుల్లి, ఉల్లిపాయలు వంటి తామసిక ఆహారాన్ని తీసుకోవద్దని చెబుతారు.

ఉల్లిపాయలు, వెల్లుల్లి దాదాపు ప్రతి ఇంట్లో ఉపయోగించినప్పటికీ, హిందూ ఆహార తత్వశాస్త్రంలో ఇవి తామసిక ఆహారంగా వర్గీకరించారు. ఎందుకంటే ఇవి మనస్సులో అజ్ఞానాన్ని, అంధకారాన్ని పెంచుతాయని, శృంగార కోరికలను ఎక్కువ చేస్తాయని నమ్మకం. ఇవి రజోగుణాలను పెంచే ఆహారాలు అని భావిస్తారు, అంటే మనిషిలో విపరీతమైన కోరికలను రేకెత్తిస్తాయి. అందుకే పూజలు, వ్రతాలు, శుభకార్యాల సమయంలో వెల్లుల్లి, ఉల్లిపాయలను తినడం నిషేధంగా పరిగణించబడింది. ఇవి రాహు, కేతువులతో సంబంధం ఉన్న ఆహారాలు అని కూడా చెబుతారు. ఉపవాసం లేదా పూజ సమయంలో తామసిక ఆహారం తింటే పూజ ఫలం తగ్గుతుందని నమ్మకం.

కొంత మంది సనాతన ధర్మాన్ని గాఢంగా నమ్మే వారు జీవితంలో ఎప్పుడూ ఉల్లి, వెల్లుల్లిని తినరు. అయితే ఎక్కువ మంది పూజలు, వ్రతాలు చేసినప్పుడు సంపూర్ణ ఫలితాలు పొందాలని భావించి ఆ రోజులలో మాత్రమే వీటిని మానేస్తారు. కానీ సనాతన ధర్మంలో నెలలో 5 ప్రత్యేక రోజుల్లో కూడా వెల్లుల్లి, ఉల్లిపాయలను పూర్తిగా దూరంగా ఉంచాలని చెబుతారు. ఆ 5 రోజులు ఎవివో ఇప్పుడు చూద్దాం.

అమావాస్య: అమావాస్య తిధి పూర్వీకుల పూజకు సంబంధించినది. ఈ రోజున పూర్వీకుల ఆశీర్వాదం కోసం దానాలు చేస్తారు. అందువల్ల ఈ రోజున వెల్లుల్లి, ఉల్లిపాయలు తినకూడదు. సాయంత్రం దక్షిణ దిశలో నూనె దీపం వెలిగించి పూర్వీకులను స్మరించాలి.

పౌర్ణమి: ప్రతి నెలా వచ్చే పౌర్ణమి తిధి ప్రత్యేకమైనది. ఇది లక్ష్మీ దేవి సోదరుడిగా పరిగణించే చంద్రుడికి సంబంధించిన రోజు. ఈ రోజున కూడా ఉల్లి, వెల్లుల్లి తినరాదు.

ఏకాదశి: ప్రతి నెల రెండుసార్లు వచ్చే ఏకాదశి తిధి విష్ణువు ఆరాధనకు అంకితం చేయబడింది. ఈ రోజున ఉపవాసం చేస్తారు. ఏకాదశి రోజున వెల్లుల్లి, ఉల్లిపాయలు మాత్రమే కాదు, ఏ తామసిక ఆహారమూ తినకూడదు.

గణేష్ చతుర్థి: ప్రతి నెల రెండు సార్లు వచ్చే చతుర్థి (చవితి) తిధి రోజున వినాయకుడిని పూజిస్తారు. అందుకే ఈ రోజున ఇంట్లో ఉల్లి, వెల్లుల్లిని వాడకూడదు.

ప్రదోష వ్రతం: ప్రతి నెల త్రయోదశి రోజున పాటించే ప్రదోష వ్రతం శివుని ఆరాధనకు సంబంధించినది. ఈ రోజున ఉపవాసం ఉంటారు. కనుక ఈ రోజూ వెల్లుల్లి, ఉల్లిపాయలను తినకూడదు.