D Spiritual: Nov 28: హిందూమతంలో సోమవారం శివుడిని పూజించడానికి అత్యంత పవిత్రమైన రోజుగా భావిస్తారు. ఈ రోజున శివలింగాన్ని పూజించడం ద్వారా జీవితంలోని అనేక సమస్యల నుంచి ఉపశమనం లభిస్తుందని నమ్మకం. అయితే సోమవారం శివలింగాన్ని పూజించే సమయంలో పొరపాటున కూడా కొన్ని వస్తువులను సమర్పించకూడదని శాస్త్రాలు చెబుతున్నాయి. అవేంటో తెలుసుకోవడం చాలా ముఖ్యం.
హిందూ మతగ్రంథాలలో సోమవారం ఉపవాసం గురించి ప్రత్యేకంగా ప్రస్తావించబడింది. పార్వతీదేవి శివుణ్ణి భర్తగా పొందేందుకు సోమవారం ఉపవాసం చేసేదని విశ్వాసం. సృష్టి-లయకారుడైన మహాదేవునికి ఈ రోజు అంకితం చేయబడింది. సోమవారం ఉపవాసం చేసి శివుడిని పూజించడం వలన లభించిన పుణ్యఫలంతోనే పరమశివుడు, పార్వతీదేవిని వివాహం చేసుకున్నారని కూడా చెబుతారు. ఈ రోజున భక్తులు ఉపవాసం ఉండి శివలింగానికి పూజలు చేస్తారు.
పూజ సమయంలో శివలింగానికి పూలతో పాటు అనేక వస్తువులు సమర్పిస్తారు. అయితే కొన్ని వస్తువులను శివలింగానికి సమర్పించడం నిషేధంగా పండితులు పేర్కొన్నారు. అలాంటి వస్తువులను సమర్పిస్తే పూజ ఫలితం దక్కకపోవడమే కాకుండా కొన్ని సమస్యలను కూడా ఎదుర్కోవలసి వస్తుందని నమ్మకం. కాబట్టి సోమవారం శివపూజలో ఏవి సమర్పించకూడదో తెలుసుకోవాలి.
శివలింగానికి తులసి దళాలను ఎట్టి పరిస్థితుల్లోనూ సమర్పించరాదు. పురాణాల ప్రకారం శివుడు తులసి భర్త అయిన జలంధరుడిని సంహరించాడు. అందువల్ల తులసి ఆకులు శివారాధనలో ఉపయోగించరాదు. అదేవిధంగా పసుపును పవిత్రమైనదిగా భావించినప్పటికీ శివలింగానికి పసుపు వేయడం నిషిద్ధం. పసుపుతో పూజిస్తే శివుడు ఆగ్రహిస్తాడని విశ్వాసం.
అలాగే శివలింగానికి కొబ్బరినీళ్లు సమర్పించకూడదు. కొబ్బరి నీరు శివునికి కోపం తెప్పిస్తుందని, దీనివల్ల ఆర్థిక ఇబ్బందులు రావచ్చని మత విశ్వాసం. విరిగిన అన్నం కూడా శివపూజలో ఉపయోగించరాదు. నూకలతో చేసిన అక్షతలు లేదా ఆ బియ్యంతో తయారు చేసిన పదార్థాలను నైవేద్యంగా పెట్టడం పూజా ఫలితాన్ని తగ్గిస్తుంది.
అదే విధంగా నువ్వులను పాలలో కలిపి శివలింగానికి సమర్పించడం కూడా నిషిద్ధం. ఇవన్ని పురాణాలు, ఆచారాలు సూచించిన నిషేధాలు.