మేడారం జాతరకు ఆధునిక హంగులు.. మాస్టర్ ఫ్లాన్‌కు శ్రీకారం చుట్టిన సీఎం రేవంత్..!

D Spiritual: Sep 24:మేడారం సమ్మక్క-సారక్క గద్దెల ప్రాంగణ పునర్నిర్మాణానికి శ్రీకారం

ముఖ్యమంత్రి రేవంత్ రెడ్డి ప్రత్యేక దర్శనం

మేడారం సమ్మక్క-సారక్క దేవతల గద్దెల ప్రాంగణ పునర్నిర్మాణానికి తెలంగాణ రాష్ట్ర ముఖ్యమంత్రి రేవంత్ రెడ్డి శ్రీకారం చుట్టారు. ఆయన స్వయంగా వనదేవతలను దర్శించుకుని ఆధునీకరణ పనులను పరిశీలించారు.
సమ్మక్క-సారక్కలకు ప్రీతికరమైన నిలువెత్తు బంగారం (బెల్లం) తులాభారం ద్వారా సమర్పించారు. ముఖ్యమంత్రి తులాభారంలో 68 కిలోలు తూగగా, అంతే బెల్లాన్ని అమ్మవార్లకు సమర్పించారు.

తెలంగాణ కుంభమేళా – మేడారం మహాజాతర

ప్రతీ రెండేళ్లకోసారి జరిగే మేడారం మహాజాతరను తెలంగాణ కుంభమేళాగా భావిస్తారు. ఈ ఉత్సవంలో పాల్గొనేందుకు యావత్ తెలంగాణతో పాటు పొరుగు రాష్ట్రాల భక్తులు కూడా మేడారం వైపు దారితీస్తారు.
ప్రతి జాతరలో రోజుకు సగటున 40 లక్షల మంది భక్తులు విచ్చేస్తారు. భక్తుల సంఖ్య పదీపదిహేను శాతం పెరుగుతుండటంతో, భవిష్యత్ అవసరాలకు తగ్గట్టు జాతర ప్రాంగణానికి కొత్త రూపు ఇవ్వాలని ప్రభుత్వం నిర్ణయించింది.

మాస్టర్ ప్లాన్ సిద్ధం

మేడారం గద్దెల ప్రాంగణాన్ని వందేళ్లపాటు చెక్కుచెదరని నిర్మాణంగా తీర్చిదిద్దేందుకు రాష్ట్ర ప్రభుత్వం మాస్టర్ ప్లాన్ సిద్ధం చేసింది. ఈ పనిలో పూజారులు, ఆదివాసీలు ఇచ్చిన సూచనలను పరిగణనలోకి తీసుకున్నారు.
ఆదివాసీలు ప్రకృతిని ఆరాధిస్తారు. విగ్రహారాధన, వాస్తుశాస్త్రం, ఆగమశాస్త్ర నియమాలకు విరుద్ధంగా ఉండటంతో, ఈ పునర్నిర్మాణం సవాళ్లతో కూడుకున్నది. అందుకే ప్రత్యేక ఆర్కిటెక్ట్ సిబ్బందిని నియమించి, స్థానిక సంప్రదాయాలకు అనుగుణంగా తుది నమూనా రూపొందించారు.

ఘన స్వాగతం

ప్రత్యేక హెలికాప్టర్‌లో మేడారంకు చేరుకున్న ముఖ్యమంత్రి రేవంత్ రెడ్డికి స్థానిక ఎమ్మెల్యే, రాష్ట్ర మంత్రి సీతక్క, పూజారులు, ఆదివాసీలు ఘన స్వాగతం పలికారు. ఆదివాసీ సంప్రదాయాలకు అనుగుణంగా డోలి వాయిద్యాలతో స్వాగతం పలకడం విశేషం.

విశేషం – 68 కిలోలు మారని బరువు

2024 మహాజాతర సందర్భంగా కూడా ముఖ్యమంత్రి రేవంత్ రెడ్డి నిలువెత్తు బంగారం (బెల్లం) సమర్పించినప్పుడు ఆయన 68 కిలోలు తూగారు. రెండేళ్లు గడిచినా ఇప్పుడు కూడా అదే బరువుతో తులాభారం జరగడం భక్తుల్లో ఆసక్తి రేపుతోంది.