D Spiritual: Oct 8: తిరుచానూరులో ఏనుగు దాడి: తిరుచానూరు శ్రీపద్మావతి అమ్మవారి ఆలయ ప్రాంగణంలో విషాదకర ఘటన చోటుచేసుకుంది. ఆలయానికి చెందిన ‘శ్రీనిధి’ అనే ఏనుగు దాడిలో తీవ్రంగా గాయపడిన మావటి చంద్రశేఖర్‌రెడ్డి (46) చికిత్స పొందుతూ మృతి చెందారు. ఈ ఘటనతో ఆలయ సిబ్బంది, స్థానికులు తీవ్ర దిగ్భ్రాంతికి గురయ్యారు.
ఈ నెల 4వ తేదీన ఆలయంలో ఊంజల్ సేవ జరుగుతున్న సమయంలో ఈ ప్రమాదం చోటుచేసుకుంది. ఏనుగును పర్యవేక్షిస్తున్న సమయంలో అనుకోకుండా ‘శ్రీనిధి’ ఏనుగు మావటి చంద్రశేఖర్‌రెడ్డిపై ఒక్కసారిగా దాడి చేసింది. ఈ ఘటనలో ఆయన తీవ్రంగా గాయపడ్డారు.
ఏనుగు దాడిలో తీవ్రంగా గాయపడిన చంద్రశేఖర్‌రెడ్డిని అధికారులు వెంటనే తిరుపతిలోని శ్రీ వెంకటేశ్వర ఇన్‌స్టిట్యూట్ ఆఫ్ మెడికల్ సైన్సెస్ (SVIMS) ఆసుపత్రికి తరలించారు. వైద్యులు ఆయనకు అత్యవసర చికిత్స అందించినప్పటికీ ఆరోగ్యం విషమించడంతో చికిత్స పొందుతూ తుదిశ్వాస విడిచారు.
తన భర్త మృతికి దారితీసిన పరిస్థితులపై చంద్రశేఖర్‌రెడ్డి భార్య జ్యోతి తిరుచానూరు పోలీసులను ఆశ్రయించారు. ఆమె ఫిర్యాదు మేరకు పోలీసులు కేసు నమోదు చేసి ఘటనపై దర్యాప్తు చేపట్టారు. ఈ ఘటన నేపథ్యంలో ఆలయాల్లో భక్తులు, సిబ్బంది భద్రతకు తీసుకోవాల్సిన చర్యలపై మరోసారి చర్చ మొదలైంది.