D Spiritual: Feb 26: పెద్దహోతురు – మేడలేని ఊరి ప్రత్యేక సంప్రదాయం
హుచ్చు వీరప్ప తాతపై అపార భక్తి
కర్నూలు జిల్లా ఆలూరు మండలంలోని పెద్దహోతురులో అన్ని కులాల వారు హుచ్చు వీరప్ప తాత ఆలయం ను ఆరాధ్య దైవంగా భావించి భక్తితో పూజిస్తారు. గ్రామ కట్టుబాటు ప్రకారం తాత ఆలయం ఎత్తును మించి ఇళ్ల నిర్మాణాలు చేపట్టరాదు అనే సంప్రదాయం నేటికీ కట్టుదిట్టంగా అమలవుతోంది.
వందేళ్ల నాటి సంఘటన – సంప్రదాయానికి ఆది
గ్రామంలో ప్రచారం ప్రకారం వందేళ్ల క్రితం ఒక భూస్వామి ఆలయం కంటే ఎత్తుగా ఇల్లు నిర్మించేందుకు ప్రయత్నించాడని, ఆ సమయంలో అతని కుటుంబంలో అనూహ్య సంఘటనలు చోటుచేసుకున్నాయని చెబుతారు. ఆ కుటుంబం ఆర్థిక ఇబ్బందులతో ఊరు విడిచి వెళ్లాల్సి వచ్చిందని గ్రామ పెద్దలు చెప్పుకుంటారు. అప్పటి నుంచి గ్రామస్తులు ఆలయం ఎత్తును మించకుండా ఇళ్లను నిర్మించడం ఆనవాయితీగా కొనసాగిస్తున్నారు. ఈ కారణంగానే పెద్దహోతురును “మేడలేని ఊరు”గా పిలుస్తారు.
ధనవంతులైనా సంప్రదాయానికి కట్టుబాటు
గ్రామంలో వందల ఎకరాల భూములు కలిగిన రైతులు, ధనవంతులైనా ఈ నియమాన్ని అతిక్రమించరు. ఆలయం పట్ల ఉన్న గౌరవభావం, భక్తి కారణంగా ఎవరూ మేడలు కట్టకుండా ఈ ఆచారాన్ని పాటిస్తున్నారు. ఇది గ్రామ ఐక్యతకు నిదర్శనంగా నిలుస్తోంది.
అందరిలో ఒకే పేర్ల ప్రాధాన్యం
గ్రామంలో హుచ్చు వీరప్ప తాత పేరు అత్యంత ప్రాచుర్యం పొందింది. పెద్ద హుచ్చురప్ప, చిన్న హుచ్చురప్ప, పెద్ద హుచ్చురమ్మ, చిన్న హుచ్చురమ్మ వంటి పేర్లు చాలా ఇళ్లలో కనిపించడం విశేషం. ఇది తాతపై గ్రామస్తుల అపార విశ్వాసాన్ని ప్రతిబింబిస్తుంది.
ప్రతి ఏడాది వైభవోత్సవాలు
హుచ్చు వీరప్ప తాత ఆరాధన ఉత్సవాలు ప్రతి సంవత్సరం ఫిబ్రవరి నెలలో వారం రోజుల పాటు ఘనంగా జరుగుతాయి. కర్ణాటకతో పాటు ఆంధ్రప్రదేశ్లోని పలు ప్రాంతాల నుంచి భక్తులు పెద్ద సంఖ్యలో వచ్చి పూజలు నిర్వహిస్తారు.
పూల అలంకరణలో ప్రత్యేకత
ఆలూరు నియోజకవర్గంలోనే ప్రత్యేకంగా తాత వారి మూలవిరాట్ను విభిన్న రకాల పూలతో అలంకరించడం ఈ ఆలయ ప్రత్యేకత. ప్రతి సంవత్సరం సెప్టెంబర్ నెలలో ఏడు రోజుల పాటు పంచాక్షరి జపంతో ఈ పూల అలంకరణ ఉత్సవాలు జరుగుతాయి. గ్రామంలోని అన్ని కులాల వారు కలిసి ఈ వేడుకలను ఎంతో భక్తి శ్రద్ధలతో నిర్వహించడం ఏళ్లుగా వస్తున్న సంప్రదాయం.