D News: ఐబొమ్మ పైరసీ కేసులో అరెస్టై, జైలు నుంచి బయటకు వచ్చిన రవికి తాజాగా ఆర్థిక ఇబ్బందులు ఎదురైనట్లు తెలుస్తోంది. తన బ్యాంక్ ఖాతాలు ఫ్రీజ్ కావడంతో కుటుంబ పోషణ, నిత్యావసరాలు, వైద్య ఖర్చులు కూడా భరించలేకపోతున్నానని పేర్కొంటూ నాంపల్లి కోర్టును ఆశ్రయించినట్లు సమాచారం.
ఖాతాలు అన్‌ఫ్రీజ్ చేయాలని విజ్ఞప్తి
ఐబొమ్మ పైరసీ కేసు దర్యాప్తులో భాగంగా రవి అరెస్ట్ అయిన సమయంలో ఆయనకు సంబంధించిన బ్యాంక్ ఖాతాలు, ప్రాపర్టీ డిపాజిట్లను అధికారులు ఫ్రీజ్ చేసినట్లు సమాచారం. ప్రస్తుతం ఖాతాలు అందుబాటులో లేకపోవడంతో రోజువారీ ఖర్చులతో పాటు వైద్య అవసరాలకు కూడా ఇబ్బందులు ఎదురవుతున్నాయని రవి కోర్టు దృష్టికి తీసుకెళ్లినట్లు తెలుస్తోంది.
కుటుంబ జీవనం కొనసాగించేందుకు కనీస అవసరాలైనా తీర్చుకునేలా ఫ్రీజ్ చేసిన ఖాతాల్లో కొన్నింటినైనా అన్‌ఫ్రీజ్ చేయాలని ఆయన పిటిషన్‌లో కోరినట్లు సమాచారం. దీనిపై కోర్టు పోలీసుల వివరణ కోరే అవకాశం ఉన్నట్లు తెలుస్తోంది.
పైరసీ కేసులో ఆరోపణలు
ఐబొమ్మ వెబ్‌సైట్ ద్వారా పైరసీ సినిమాలను ప్రసారం చేసి రవి భారీగా డబ్బు సంపాదించారనే ఆరోపణలు ఉన్నాయి. తనను పోలీసులు పట్టుకోలేరంటూ గతంలో రవి సవాల్ చేసినట్లు కూడా ప్రచారం జరిగింది. ఆ తర్వాత హైదరాబాద్ వచ్చిన సమయంలో పోలీసులు నిఘా పెట్టి అతడిని అదుపులోకి తీసుకున్నట్లు సమాచారం. అనంతరం కేసులో జైలు శిక్ష అనుభవించిన రవి ప్రస్తుతం బయట ఉన్నారు.