DNews: హైదరాబాద్ జలమండలి ఐటీ విభాగం తీరుపై ట్యాంకర్ యజమానులు ఆగ్రహం వ్యక్తం చేస్తున్నారు. ఏవీటీఎస్ (AVTS) పరికరాల ఏర్పాటు పేరుతో వెస్ట్ సిటీ పరిధిలోని 300 ట్యాంకర్ల నుంచి అదనంగా సుమారు రూ.39 లక్షలు వసూలు చేసినట్లు ఆరోపణలు వస్తున్నాయి.
500 ట్రిప్పుల తర్వాత కూడా కోతలు
గత ఏడాది ఒక్కో ట్యాంకర్‌కు రూ.5 వేల విలువైన ఏవీటీఎస్ పరికరాలను ఏర్పాటు చేశారు. ఈ మొత్తాన్ని ఒక్కో ట్రిప్పుకు రూ.10 చొప్పున 500 ట్రిప్పుల్లో వసూలు చేయాలని నిర్ణయించారు. అయితే 500 ట్రిప్పులు పూర్తయినా కోతలు ఆగకపోవడంతో ట్యాంకర్ యజమానులకు అదనపు భారం పడింది.
ఒక్కో ట్యాంకర్ నుంచి రూ.13 వేలు?
ఒక్కో ట్యాంకర్ రోజుకు సగటున ఐదు ట్రిప్పులు నిర్వహిస్తుందని లెక్కిస్తే ఏడాదికి 1,800కు పైగా ట్రిప్పులు పూర్తవుతాయి. నిర్ణయించిన 500 ట్రిప్పులు మినహాయిస్తే మిగిలిన ట్రిప్పులకు కూడా రూ.10 చొప్పున కోత విధించినట్లు ఆరోపణలు ఉన్నాయి. ఈ లెక్కన ఒక్కో యజమాని నుంచి సుమారు రూ.13 వేల వరకు అదనంగా వసూలైనట్లు తెలుస్తోంది. 300 ట్యాంకర్లకు కలిపి ఈ మొత్తం సుమారు రూ.39 లక్షలుగా అంచనా వేస్తున్నారు.
అదనపు డబ్బులు రీఫండ్ చేస్తామన్న అధికారులు
ఈ వ్యవహారంపై ఐటీ విభాగం అధికారులను ప్రశ్నించగా, గడువు ముగిసినా చార్జీలు కట్ అయిన మాట వాస్తవమేనని అంగీకరించినట్లు సమాచారం. గత ఆగస్టులోనే కోతలు నిలిపివేశామని, అదనంగా వసూలైన మొత్తాన్ని ట్యాంకర్ యజమానులకు తిరిగి చెల్లిస్తామని హామీ ఇచ్చారు. అయితే డబ్బులు ఎప్పటిలోగా తిరిగి చెల్లిస్తారనే దానిపై స్పష్టత రావాల్సి ఉంది.