D News : చిన్న బడ్జెట్‌తో తెరకెక్కిన సినిమాలు కంటెంట్ బలంగా ఉంటే బాక్సాఫీస్ వద్ద ఎలాంటి సంచలనాలు సృష్టించగలవో ‘హనుమాన్ అంశ్’ మరోసారి నిరూపిస్తోంది. కేవలం రూ.2 కోట్ల బడ్జెట్‌తో రూపొందిన ఈ చిత్రం ఇప్పటికే ప్రపంచవ్యాప్తంగా భారీ వసూళ్లను సాధిస్తూ దూసుకెళ్తోంది. నీమ్ కరోలి బాబా జీవితాన్ని ఆధారంగా చేసుకుని తెరకెక్కిన ఈ సినిమాకు ప్రేక్షకుల నుంచి మంచి స్పందన లభించింది.
ఓవర్‌సీస్‌లో మరో రికార్డ్
ఇండియాలో విడుదలైన తర్వాత విదేశాల్లోనూ మంచి వసూళ్లు రాబడుతున్న ‘హనుమాన్ అంశ్’ తాజాగా మరో అరుదైన ఘనతను అందుకుంది. ఈ ఏడాది ఓవర్‌సీస్‌లో అత్యధిక వసూళ్లు సాధించిన చిత్రాల జాబితాలో రెండో స్థానంలో నిలిచినట్లు సమాచారం. విదేశాల్లో విడుదలైన 12 రోజుల్లోనే ఈ సినిమా 3.5 మిలియన్ డాలర్ల మార్కును అందుకున్నట్లు తెలుస్తోంది.
ఆగస్టు 7న భారత్‌లో విడుదలైన ఈ చిత్రాన్ని సెప్టెంబర్ 11న విదేశీ మార్కెట్లలో రిలీజ్ చేశారు. హోంబలే ఓవర్సీస్, ఫార్స్ ఫిల్మ్ సంయుక్తంగా ఓవర్‌సీస్‌లో సినిమాను విడుదల చేశాయి.
రూ.366 కోట్లకు పైగా గ్రాస్
దేశీయ బాక్సాఫీస్ వద్ద ఇప్పటి వరకు రూ.280.93 కోట్ల నెట్ వసూళ్లు సాధించినట్లు ట్రేడ్ వర్గాల సమాచారం. 47 రోజుల్లో ప్రపంచవ్యాప్తంగా రూ.366.45 కోట్ల గ్రాస్ కలెక్షన్స్ రాబట్టినట్లు పేర్కొంటున్నారు. ముఖ్యంగా ఉత్తర అమెరికాలో ఈ సినిమాకు మంచి ఆదరణ లభించింది. అక్కడ కేవలం ఆరు రోజుల్లోనే 1 మిలియన్ డాలర్ల మార్కును దాటినట్లు సమాచారం.
అంతేకాకుండా ఉత్తర అమెరికాలో ఈ ఏడాది అత్యధిక వసూళ్లు సాధించిన టాప్-10 బాలీవుడ్ చిత్రాల జాబితాలోనూ ‘హనుమాన్ అంశ్’ చోటు దక్కించుకున్నట్లు తెలుస్తోంది. ఇప్పటికే పలు బాక్సాఫీస్ రికార్డులను తన ఖాతాలో వేసుకున్న ఈ చిన్న సినిమా.. ఓవర్సీస్ మార్కెట్‌లోనూ తన జోరును కొనసాగిస్తోంది.