D News: Aug 5: హైదరాబాద్ మెట్రోలో నిత్యం ప్రయాణించే లక్షలాది మంది ఉద్యోగులు, విద్యార్థులకు త్వరలోనే భారీ ఊరట లభించే అవకాశం కనిపిస్తోంది. తెలంగాణ ప్రభుత్వం ఆధ్వర్యంలోని హైదరాబాద్ మెట్రో రైల్ లిమిటెడ్ (HMRL) ప్రయాణికుల సౌకర్యాన్ని దృష్టిలో పెట్టుకుని నెలవారీ (మంత్లీ), మూడు నెలల (క్వార్టర్లీ) మెట్రో పాస్‌లను ప్రవేశపెట్టేందుకు కసరత్తును వేగవంతం చేసింది. ఈ ప్రతిపాదన అమల్లోకి వస్తే రోజువారీగా మెట్రోను వినియోగించే ప్రయాణికుల ప్రయాణ ఖర్చు గణనీయంగా తగ్గడంతో పాటు టికెట్ కొనుగోలు ప్రక్రియ కూడా మరింత సులభంగా మారనుంది.
ఈ పాస్‌ల అమలుకు సంబంధించి ప్రస్తుతం తెలంగాణ ఆర్టీసీలో విజయవంతంగా కొనసాగుతున్న పాస్‌ల విధానాన్ని అధికారులు అధ్యయనం చేస్తున్నారు. ఆర్టీసీ అధికారులతో సమావేశమై పాస్‌ల రకాలు, వాటి ధరలు, ప్రయాణికుల స్పందన వంటి అంశాలను విశ్లేషించిన అనంతరం మెట్రో ప్రయాణికులకు అనువైన ప్రత్యేక పాస్‌లను రూపొందించాలని హెచ్‌ఎంఆర్‌ఎల్ యోచిస్తోంది. ఈ విధానం ద్వారా ప్రజా రవాణా వినియోగాన్ని మరింత ప్రోత్సహించవచ్చని అధికారులు భావిస్తున్నారు.
ప్రస్తుతం హైదరాబాద్ మెట్రోను అత్యధికంగా ఉద్యోగులు, కళాశాల విద్యార్థులే వినియోగిస్తున్నారు. ప్రతిరోజూ విడివిడిగా టికెట్లు కొనుగోలు చేయడం వల్ల నెలాఖరుకు గణనీయమైన మొత్తం ఖర్చవుతోంది. మంత్లీ లేదా క్వార్టర్లీ పాస్‌లు అందుబాటులోకి వస్తే ప్రయాణ వ్యయం తగ్గడమే కాకుండా, రెగ్యులర్ ప్రయాణికులకు సమయం కూడా ఆదా అవుతుంది. దీంతో మరింత మంది ప్రజలు మెట్రో ప్రయాణాన్ని ఎంచుకునే అవకాశాలు పెరుగుతాయని అధికారులు అంచనా వేస్తున్నారు.
ప్రస్తుతం హైదరాబాద్ మెట్రోలో ప్రతిరోజూ సగటున 4.70 లక్షల నుంచి 4.80 లక్షల మంది ప్రయాణిస్తున్నారు. పండుగలు, ప్రత్యేక సెలవు దినాల్లో ఈ సంఖ్య మరింత పెరుగుతోంది. ఈ నేపథ్యంలో కొత్త పాస్‌ల ప్రవేశంతో రోజువారీ ప్రయాణికుల సంఖ్యను మరింత పెంచాలని హెచ్‌ఎంఆర్‌ఎల్ లక్ష్యంగా పెట్టుకుంది. అదే సమయంలో పెరుగుతున్న రద్దీకి అనుగుణంగా అదనపు మెట్రో కోచ్‌లను అందుబాటులోకి తీసుకువచ్చేందుకు కూడా అధికారులు ప్రణాళికలు సిద్ధం చేస్తున్నారు.