గ్యాంగ్‌స్టర్ అతీక్ అహ్మద్ కుటుంబంలో మరొక తీవ్ర విషాదం చోటుచేసుకుంది. జైల్లో ఉన్న తన అన్నను కలిసేందుకు వెళ్తుండగా జరిగిన ఘోర రోడ్డు ప్రమాదంలో అతీక్ అహ్మద్ చిన్న కుమారుడు అబాన్ అహ్మద్ ప్రాణాలు కోల్పోయాడు. ఝాన్సీ సమీపంలోని జాతీయ రహదారిపై అతివేగంతో వెళ్తున్న కారు అదుపుతప్పి డివైడర్‌ను ఢీకొట్టడంతో అబాన్‌తో పాటు మరో వ్యక్తి అక్కడికక్కడే మరణించారు. వరుస హత్యలు, ఎన్‌కౌంటర్లతో ఇప్పటికే కుదేలైన అతీక్ కుటుంబంలో ఈ ప్రమాదం కలకలం రేపింది.
ఉత్తరప్రదేశ్ నేర చరిత్రలో ఒకప్పుడు చెరగని ముద్రవేసిన గ్యాంగ్‌స్టర్, మాజీ పార్లమెంట్ సభ్యుడు అతీక్ అహ్మద్ కుటుంబానికి మరో కోలుకోలేని షాక్ తగిలింది. ప్రస్తుతం జైలు జీవితం గడుపుతున్న తన అన్నను పరామర్శించేందుకు వెళ్తున్న సమయంలో సంభవించిన తీవ్రమైన రోడ్డు ప్రమాదంలో అతీక్ అహ్మద్ చిన్న కుమారుడు అబాన్ అహ్మద్ మరణించాడు. ఝాన్సీ ప్రాంతంలోని జాతీయ రహదారిపై ఈ దారుణ సంఘటన వెలుగు చూసింది. అబాన్ ప్రయాణిస్తున్న కారు ఒక్కసారిగా అదుపుతప్పి రహదారి డివైడర్‌ను అత్యంత బలంగా ఢీకొనడంతో ఈ ప్రమాజం చోటు చేసుకుంది.
ప్రమాదం జరిగిన సమయంలో వాహనంలో అబాన్‌తో పాటు మరో నలుగురు ప్రయాణిస్తున్నారు. కారు వేగం విపరీతంగా ఉండటంతో డివైడర్‌ను గుద్దిన తీవ్రతకు వాహనం ముందు భాగం గుర్తుపట్టలేని విధంగా నుజ్జునుజ్జ అయ్యింది. ఈ ప్రమాద ధాటికి అబాన్ అహ్మద్‌తో పాటు కారులోని మరో వ్యక్తి అక్కడికక్కడే ప్రాణాలు కోల్పోయారు. అయితే ఈ దుర్ఘటనకు కారు మితిమీరిన వేగంతో వెళ్లడమే ప్రధాన కారణమై ఉంటుందని పోలీసులు ప్రాథమికంగా భావిస్తున్నారు.