D Spiritual: Feb 21: కాశీ యాత్రకు వెళ్లిన ప్రతి భక్తుడి మనసులో ఒక ప్రత్యేక కోరిక ఉంటుంది — గంగా మాతను దర్శించుకుని ఆ పవిత్ర జలాన్ని ఇంటికి తెచ్చుకోవాలని. భారతీయ సంస్కృతిలో గంగానదికి ఉన్న ప్రాముఖ్యత అపారము. కాశీ ఘాట్ల నుండి గంగా జలాన్ని తీసుకురావడం మహా పుణ్యకార్యంగా భావిస్తారు. అయితే ఆ పవిత్ర జలాన్ని ఇంటికి తెచ్చేటప్పుడు, భద్రపరిచేటప్పుడు కొన్ని ఆధ్యాత్మిక నియమాలను పాటించడం ద్వారా సంపూర్ణ ఫలితం పొందవచ్చని శాస్త్రాలు సూచిస్తున్నాయి.
కాశీ నుండి గంగా జలం తెచ్చుకోవచ్చా? ఖచ్చితంగా తెచ్చుకోవచ్చు. శాస్త్రాల ప్రకారం గంగా జలం ఎప్పటికీ పాడవదని విశ్వాసం. కాశీలో విశ్వేశ్వరుని పాదాలను తాకి ప్రవహించే ఈ పవిత్ర జలాన్ని ఇంట్లో ఉంచుకోవడం వలన ప్రతికూల శక్తులు తొలగి సానుకూల శక్తులు పెరుగుతాయని నమ్మకం ఉంది. అయితే గంగా జలాన్ని సేకరించే సమయంలో పవిత్రమైన మనస్సుతో, గంగా మాతను స్మరించుకుంటూ తీసుకురావడం శ్రేయస్కరం.
చాలామంది కాశీ ఘాట్ల వద్ద లభించే ప్లాస్టిక్ బాటిల్స్లో గంగా జలాన్ని తెస్తుంటారు. కానీ ప్లాస్టిక్ పాత్రలను అపవిత్రంగా భావిస్తారు. అందువల్ల ఇంటికి వచ్చిన తర్వాత వెంటనే ఆ జలాన్ని రాగి లేదా ఇత్తడి పాత్రలోకి మార్చడం మంచిది. లోహ పాత్రల్లో గంగా జలాన్ని నిల్వ చేయడం వల్ల దాని పవిత్రత, శక్తి నిలకడగా ఉంటాయని విశ్వాసం.
ఇంట్లో గంగా జలం ఉండటం వల్ల వాస్తు దోషాలు తొలగిపోతాయని చెబుతారు. శుభకార్యాల సమయంలో లేదా గ్రహణం అనంతరం ఇంటిని గంగా జలంతో శుద్ధి చేయడం ద్వారా సానుకూల శక్తి వ్యాప్తి చెందుతుందని నమ్మకం. హిందూ సంప్రదాయం ప్రకారం మరణ సమయాన గంగా జలాన్ని నోటిలో చిమ్మడం వలన మోక్షం లభిస్తుందని విశ్వాసం ఉంది.
రోజువారీ పూజ సమయంలో గంగా జలాన్ని అభిషేకానికి ఉపయోగించవచ్చు. అలాగే క్లిష్ట పరిస్థితుల్లో లేదా మనస్సు ఆందోళనగా ఉన్నప్పుడు కొద్దిగా గంగా జలాన్ని ప్రోక్షించుకోవడం ద్వారా మనశ్శాంతి కలుగుతుందని భక్తులు భావిస్తారు.