జూబ్లీహిల్స్ పెద్దమ్మతల్లి ఆలయంలో చోరీ ఘటన తీవ్ర కలకలం రేపింది. పూజలు చేసేందుకు ఆలయానికి వచ్చిన ఓ మహిళ బ్యాగ్‌ను గుర్తుతెలియని వ్యక్తి అపహరించినట్లు పోలీసులు తెలిపారు. ఆ పౌచ్‌లో 5 వెండి బిస్కెట్లతో పాటు రూ.5 వేల నగదు ఉన్నట్లు బాధితురాలు పోలీసులకు ఫిర్యాదు చేసింది. బోనాల పండగ సందర్భంగా భారీగా భక్తుల రద్దీని ఆసరాగా చేసుకుని నిందితుడు చోరీకి పాల్పడినట్లు అనుమానిస్తున్నారు. బాధితురాలి ఫిర్యాదు మేరకు జూబ్లీహిల్స్ పోలీసులు కేసు నమోదు చేసి దర్యాప్తు ప్రారంభించారు.
హైదరాబాద్‌లో బోనాల పండుగ సందడి కొనసాగుతున్న వేళ జూబ్లీహిల్స్‌లోని ప్రముఖ పెద్దమ్మతల్లి ఆలయంలో బోనాల పర్వదినం సందర్భంగా జరిగిన దొంగతనం సంచలనం రేపుతోంది. ఆలయానికి వచ్చిన ఓ మహిళ బ్యాగ్‌ను గుర్తుతెలియని వ్యక్తి చాకచక్యంగా కోసి అందులోని పౌచ్‌ను అపహరించినట్లు పోలీసులు తెలిపారు. ఈ సంఘటనతో ఆలయానికి వచ్చిన భక్తుల్లో తీవ్ర ఆందోళన నెలకొంది. పోలీసులు వెల్లడించిన వివరాల ప్రకారం.. మియాపూర్‌లోని మాతృశ్రీనగర్ కాలనీకి చెందిన నాగలక్ష్మి వృత్తిరీత్యా టీచర్.
ఈ క్రమంలోనే ఆదివారం ఉదయం సుమారు 10:30 గంటల సమయంలో ఆమె జూబ్లీహిల్స్ పెద్దమ్మతల్లి ఆలయానికి వెళ్లారు. పూజలు చేస్తుండగా గుర్తుతెలియని వ్యక్తి ఆమె బ్యాగ్‌ను చాకచక్యంగా కోసినట్లు తెలుస్తోంది. ఆ తర్వాత బ్యాగ్‌లో ఉన్న పౌచ్‌ను తీసుకుని అక్కడి నుంచి తప్పించుకున్నాడు. తన బ్యాగ్‌లోని పౌచ్ కనిపించకపోవడంతో నాగలక్ష్మి ఆందోళనకు గురయ్యారు. పౌచ్‌లో ఐదు వెండి బిస్కెట్లతోపాటు రూ.5 వేల నగదు ఉన్నట్లు ఆమె పోలీసులకు ఇచ్చిన ఫిర్యాదులో పేర్కొన్నారు.
భక్తుల రద్దీ ఎక్కువగా ఉండటంతో ఆ గందరగోళాన్ని ఉపయోగించుకుని నిందితుడు చోరీకి పాల్పడి ఉంటాడని పోలీసులు అనుమానం వ్యక్తం చేస్తున్నారు. బాధితురాలు వెంటనే జూబ్లీహిల్స్ పోలీసులను ఆశ్రయించి ఫిర్యాదు చేశారు. ఆమె ఫిర్యాదు ఆధారంగా పోలీసులు కేసు నమోదు చేసి దర్యాప్తు ప్రారంభించారు. బాధితురాలి ఫిర్యాదుతో రంగంలోకి దిగిన పోలీసులు.. సీసీ కెమెరా ఫుటేజీలను పరిశీలిస్తున్నారు. నిందితుడి కదలికలను గుర్తించేందుకు ఆలయంలోని కెమెరాలతో పాటు పరిసర ప్రాంతాల్లోని సీసీటీవీ దృశ్యాలను కూడా చెక్ చేస్తున్నారు. ఆ సీసీటీవీ ఫుటేజీ ఆధారంగా నిందితుడిని గుర్తించేందుకు పోలీసులు ప్రయత్నిస్తున్నారు.