DET:DEC 04:
సినీ పరిశ్రమలో విషాదం ఏవీఎం శరవణన్ మృతి:
తమిళ చిత్ర పరిశ్రమకు చెందిన ప్రముఖ నిర్మాత ఏవీఎం స్టూడియోస్ అధినేత ఎం.శరవణన్ గురువారం డిసెంబర్ 4,2025 చెన్నైలో కన్నుమూశారు.ఆయన వయస్సు 89.వృద్ధాప్యం సంబంధిత అనారోగ్య సమస్యల కారణంగా ఆయన తుది శ్వాస విడిచారు.భారతీయ సినిమాకు ముఖ్యంగా తమిళ చిత్ర పరిశ్రమకు ఆయన అందించిన సేవలు అపారమైనవి.నిన్ననే డిసెంబర్ 3 ఆయన పుట్టినరోజు జరుపుకున్న మరుసటి రోజు మరణించడం సినీ లోకంలో తీవ్ర విషాదాన్ని నింపింది.
ప్రముఖులు నివాళులు ఎంకే స్టాలిన్ సంతాపం:
శరవణన్ మరణ వార్త విని తమిళనాడు ముఖ్యమంత్రి ఎంకే స్టాలిన్ తీవ్ర విచారం వ్యక్తం చేశారు.ఏవీఎం సంస్థ తమిళ సినిమా గమనాన్ని ప్రభావితం చేసినట్లే ఏవీఎం ఎదుగుదలలో శరవణన్ గారి పాత్ర కూడా ఎంతో ఉందని ఆయన పేర్కొన్నారు.ద్రవిడ ఉద్యమ సినీ ప్రయాణంతో ఏవీఎం స్టూడియోస్కు లోతైన అనుబంధం ఉందని గుర్తు చేసుకున్నారు.శరవణన్ తమ కుటుంబంలో ఒకరిగా మారారని ఆయన మరణం తీరని లోటు అని స్టాలిన్ సంతాపం తెలిపారు.
సూపర్స్టార్ రజనీకాంత్ అంతిమ వీడ్కోలు:
సూపర్స్టార్ రజనీకాంత్ ఏవీఎం శరవణన్తో అత్యంత సన్నిహిత సంబంధాన్ని కలిగి ఉన్నారు.ఏవీఎం సంస్థ నిర్మించిన శివాజీ ది బాస్ చిత్రంలో రజనీకాంత్ నటించారు.శరవణన్ భౌతిక కాయానికి నివాళులు అర్పించడానికి రజనీకాంత్ విచ్చేసి,కుటుంబ సభ్యులను ఓదార్చారు.సినీ ప్రముఖులతో పాటు రాజకీయ నాయకులు అభిమానులు పెద్ద సంఖ్యలో స్టూడియోకి చేరుకున్నారు.
శివకుమార్ సూర్య భావోద్వేగం:
నటులు శివకుమార్ ఆయన తనయుడు సూర్య శరవణన్కు అంతిమ వీడ్కోలు పలకడానికి వచ్చారు.ఈ సందర్భంగా సూర్య ఎంతో భావోద్వేగానికి గురై కన్నీళ్లు పెట్టుకోవడం అక్కడున్న వారందరినీ కలిచివేసింది.అలాగే ప్రముఖ నటి కె.ఆర్.విజయ కూడా శరవణన్ గారికి నివాళులర్పించారు.ఈ లెజెండరీ నిర్మాతతో పనిచేసిన అనుబంధాన్ని పలువురు గుర్తు చేసుకున్నారు.
ఏవీఎం శరవణన్ సినీ ప్రయాణం:
ఏవీఎం సంస్థ వ్యవస్థాపకుడు ఏవీ మెయ్యప్పన్ చెట్టియార్ కుమారుడైన ఎం.శరవణన్ 1950ల చివర్లో తమ నిర్మాణ సంస్థ బాధ్యతలను స్వీకరించారు.నానుమ్ ఒరు పెణ్,సంసారం అధు మిన్సారం,మిన్సార కనవు,శివాజీ ది బాస్ వంటి ఎన్నో విజయవంతమైన చిత్రాలను నిర్మించారు.తెలుగులో కూడా లీడర్,ఆ ఒక్కటి అడక్కు,బామ్మ మాట బంగారు బాట వంటి చిత్రాలను అందించారు. నాణ్యమైన చిత్ర నిర్మాణానికి ఏవీఎం సంస్థ చిరునామాగా నిలిచింది.