DNews: మహబూబాబాద్ జిల్లా గూడూరు మండలంలోని ప్రభుత్వ గిరిజన పాఠశాలల్లో కొందరు ఉపాధ్యాయులు విధులకు గైర్హాజరవుతున్నారనే ఆరోపణలు వెల్లువెత్తుతున్నాయి. ఉదయాన్నే పాఠశాలకు వచ్చి ఎఫ్ఆర్ఎస్ యాప్‌లో ఫొటోలు అప్‌లోడ్ చేసి హాజరు నమోదు చేసుకుంటున్నారని, అనంతరం రాజకీయ కార్యక్రమాల్లో పాల్గొంటున్నారని స్థానికులు ఆరోపిస్తున్నారు.
విద్యార్థులకు తప్పని ఇబ్బందులు
వంపు తండా, చిర్రకుంట కోయగూడెం, రాంపురం, బొద్దుగోండ, చిల్లగండి తండా ప్రాంతాల్లోని పాఠశాలల్లో ఈ పరిస్థితి ఉందని తల్లిదండ్రులు చెబుతున్నారు. ఉపాధ్యాయులు తరగతులకు హాజరుకాకపోవడంతో విద్యార్థుల చదువులు దెబ్బతింటున్నాయని ఆవేదన వ్యక్తం చేస్తున్నారు.
చర్యలు తీసుకోవాలని డిమాండ్
ఈ వ్యవహారంపై జిల్లా అధికారులు స్పందించి సమగ్ర విచారణ చేపట్టాలని స్థానికులు కోరుతున్నారు. విధుల పట్ల నిర్లక్ష్యం వహించినట్లు తేలితే సంబంధిత ఉపాధ్యాయులపై కఠిన చర్యలు తీసుకోవాలని, గిరిజన పాఠశాలల్లో విద్యాబోధన సక్రమంగా జరిగేలా చూడాలని విద్యార్థి సంఘాల నాయకులు డిమాండ్ చేస్తున్నారు.