రాజన్న సిరిసిల్ల జిల్లాలో మానవత్వాన్ని ప్రశ్నించే హృదయవిదారక ఘటన చోటుచేసుకుంది. తీవ్ర అనారోగ్యంతో బాధపడుతున్న ఓ వ్యక్తికి అద్దె ఇంట్లో ఆశ్రయం లభించకపోవడంతో కుటుంబ సభ్యులు అతడిని వేములవాడలోని వైకుంఠధామానికి తీసుకెళ్లారు. ప్రస్తుతం అక్కడే అతడికి ఆశ్రయం కల్పిస్తూ కుటుంబ సభ్యులు బాగోగులు చూసుకుంటున్నారు. ఈ ఘటన స్థానికంగా తీవ్ర చర్చనీయాంశంగా మారింది.
అనారోగ్యంతో ప్రాణాలతో పోరాటం
మర్రిపల్లి రాకేష్ కొంతకాలంగా తీవ్ర అనారోగ్య సమస్యలతో బాధపడుతున్నాడు. జాండీస్‌తో పాటు శ్వాస సంబంధిత వ్యాధులతో ఇబ్బందులు పడుతున్నాడు. మెరుగైన వైద్యం అందించేందుకు కుటుంబ సభ్యులు పలు ఆస్పత్రులకు తీసుకెళ్లినా అతడి ఆరోగ్య పరిస్థితిలో ఆశించిన మార్పు రాలేదు. ప్రస్తుతం రాకేష్ ఆరోగ్యం మరింత క్షీణించడంతో ప్రాణాలతో పోరాడుతున్నాడు.
అద్దె ఇంట్లోనూ దక్కని ఆశ్రయం
ఇప్పటికే అనారోగ్యం, ఆర్థిక ఇబ్బందులతో సతమతమవుతున్న రాకేష్ కుటుంబానికి మరో సమస్య ఎదురైంది. వారు నివసిస్తున్న అద్దె ఇంట్లోకి రాకేష్‌ను తీసుకురావడానికి ఇంటి యజమాని అనుమతించలేదని కుటుంబ సభ్యులు చెబుతున్నారు. ఎక్కడా ఆశ్రయం దొరకని పరిస్థితిలో చేసేదేమీ లేక అతడిని వేములవాడ వైకుంఠధామానికి తీసుకెళ్లారు.
ప్రస్తుతం అక్కడే రాకేష్‌కు ఆశ్రయం కల్పించి కుటుంబ సభ్యులు అతడి సంరక్షణ చూసుకుంటున్నారు. బతికుండగానే తమ కుటుంబం స్మశానవాటికకు చేరాల్సిన పరిస్థితి వచ్చిందంటూ వారు కన్నీరుమున్నీరవుతున్నారు. తీవ్ర అనారోగ్యంతో బాధపడుతున్న వ్యక్తికి కనీసం నివాసం కూడా దొరకకపోవడం బాధాకరమని ఆవేదన వ్యక్తం చేస్తున్నారు.
ఎమ్మెల్యే ఆదుకోవాలని కుటుంబ సభ్యుల వేడుకోలు
తమ దుస్థితిని గుర్తించి స్థానిక ఎమ్మెల్యే ఆది శ్రీనివాస్ స్పందించాలని రాకేష్ కుటుంబ సభ్యులు విజ్ఞప్తి చేస్తున్నారు. రాకేష్‌కు తక్షణమే మెరుగైన వైద్యం అందించాలని, తమ కుటుంబానికి నివాస సౌకర్యంతో పాటు ఆర్థిక సహాయం కల్పించాలని కోరుతున్నారు.
Elections Live Updates in DTV Digital
అనారోగ్యంతో బాధపడుతున్న వ్యక్తికి ఆశ్రయం కూడా లభించక వైకుంఠధామంలో ఉండాల్సిన పరిస్థితి రావడం స్థానికంగా కలకలం రేపుతోంది. బాధిత కుటుంబానికి ప్రభుత్వం, ప్రజాప్రతినిధులు తక్షణ సాయం అందించాలని పలువురు కోరుతున్నారు.