క్రీడా పోటీల నిర్వహణ పేరుతో విద్యార్థుల తల్లిదండ్రులపై అదనపు ఫీజుల భారం.. ఒక్కో అథ్లెటిక్స్ ఈవెంట్‌కు రూ.300, ఫుట్‌బాల్ జట్టుకు రూ.3,200 వసూలు.. పట్టించుకోని విద్యాశాఖ అధికారులు!
హైదరాబాద్, నవంబర్ 5: పిల్లలకు నాణ్యమైన విద్య అందించాలంటే తల్లిదండ్రులు భారీ మొత్తంలో ఖర్చు చేయాల్సిన పరిస్థితి నెలకొంది. ముఖ్యంగా హైదరాబాద్‌లోని కొన్ని ఇంటర్నేషనల్ స్కూళ్లలో విద్యా ఫీజులతో పాటు వివిధ కార్యక్రమాల పేరుతో అదనపు వసూళ్లు జరుగుతున్నాయనే ఆరోపణలు వినిపిస్తున్నాయి. చిల్డ్రన్స్ డే, టీచర్స్ డే, స్వాతంత్ర్య దినోత్సవం వంటి ప్రత్యేక సందర్భాల్లో నిర్వహించే కార్యక్రమాలకు కూడా విద్యార్థుల నుంచి డబ్బులు వసూలు చేస్తున్నారని తల్లిదండ్రులు ఆవేదన వ్యక్తం చేస్తున్నారు.
తాజాగా నగరంలోని ఓ ప్రముఖ ఇంటర్నేషనల్ పబ్లిక్ స్కూల్ విడుదల చేసిన సర్క్యులర్ ఈ వివాదానికి మరింత ఆజ్యం పోసింది. తెలంగాణ స్పోర్ట్స్ లీగ్ పేరుతో నిర్వహించనున్న క్రీడా పోటీలకు భారీగా రిజిస్ట్రేషన్ ఫీజులు నిర్ణయించడంపై తల్లిదండ్రులు అభ్యంతరం వ్యక్తం చేస్తున్నారు. ఇప్పటికే లక్షల్లో ఫీజులు చెల్లిస్తున్నప్పటికీ, ప్రతి కార్యక్రమానికి అదనంగా డబ్బులు వసూలు చేయడం ఏమిటని ప్రశ్నిస్తున్నారు.
తెలంగాణ స్పోర్ట్స్ లీగ్ పేరుతో ప్రత్యేక పోటీలు
నవంబర్ 14న చిల్డ్రన్స్ డే సందర్భంగా ఈ ఇంటర్నేషనల్ స్కూల్ తెలంగాణ స్పోర్ట్స్ లీగ్ నిర్వహించేందుకు సిద్ధమైంది. ఇందులో భాగంగా 4 నుంచి 9వ తరగతి వరకు చదువుతున్న విద్యార్థుల తల్లిదండ్రులకు ప్రత్యేక సర్క్యులర్ జారీ చేసింది. అథ్లెటిక్స్ పోటీలను నవంబర్ 7, 2026న నిర్వహించనున్నట్లు ప్రకటించింది. అలాగే ఫుట్‌బాల్, బ్యాడ్మింటన్ పోటీలను నవంబర్ 11, 12 తేదీల్లో నిర్వహించనున్నట్లు వెల్లడించింది. ఈ పోటీల్లో బాలురు, బాలికలు పాల్గొనే అవకాశం కల్పించింది. రిజిస్ట్రేషన్‌కు అక్టోబర్ 31, 2026ను చివరి తేదీగా నిర్ణయించింది.
ఒక్కో అథ్లెటిక్స్ ఈవెంట్‌కు రూ.300 ఫీజు
నవంబర్ 7న జరిగే అథ్లెటిక్స్ పోటీల్లో 60 మీటర్లు, 80 మీటర్లు, 100 మీటర్లు, 200 మీటర్లు, 400 మీటర్ల పరుగుతో పాటు 4×100 మీటర్ల రిలే, లాంగ్ జంప్, ట్రిపుల్ జంప్, హైజంప్, షాట్‌పుట్, జావెలిన్ త్రో వంటి విభాగాలను చేర్చారు. వయస్సుల ఆధారంగా వివిధ కేటగిరీల్లో పోటీలు నిర్వహించనున్నారు.
అయితే వ్యక్తిగత అథ్లెటిక్స్ ఈవెంట్‌లో పాల్గొనే ప్రతి విద్యార్థి రూ.300 రిజిస్ట్రేషన్ ఫీజు చెల్లించాల్సి ఉంటుంది. 4×100 మీటర్ల రిలే పోటీలో పాల్గొనే ఒక్కో జట్టుకు రూ.800 వసూలు చేయనున్నారు. జావెలిన్ త్రోకు సంబంధించిన వయస్సు విభాగాలను ఇంకా ఖరారు చేయాల్సి ఉంది.
ఫుట్‌బాల్ జట్టుకు రూ.3,200 రిజిస్ట్రేషన్ ఫీజు
ఇక నవంబర్ 11, 12 తేదీల్లో నిర్వహించనున్న ఫుట్‌బాల్ పోటీల్లో అండర్-10, అండర్-12, అండర్-14, అండర్-16 విభాగాలను ఏర్పాటు చేశారు. బాలురు, బాలికలకు వేర్వేరుగా పోటీలు నిర్వహించనున్నారు. ఒక్కో జట్టు రిజిస్ట్రేషన్ కోసం రూ.3,200 ఫీజుగా నిర్ణయించారు. బ్యాడ్మింటన్ పోటీలకు సంబంధించిన ఫీజుల వివరాలు కూడా సర్క్యులర్‌లో ప్రకటించినట్లు సమాచారం.
తల్లిదండ్రుల ఆందోళన.. విద్యాశాఖ ఏం చేస్తోంది?
స్కూళ్లలో క్రీడలు, ఇతర సాంస్కృతిక కార్యక్రమాలను ప్రోత్సహించడం మంచిదే అయినప్పటికీ, వాటి పేరుతో విద్యార్థులపై అదనపు ఆర్థిక భారం మోపడం ఎంతవరకు సమంజసమని తల్లిదండ్రులు ప్రశ్నిస్తున్నారు. ఇప్పటికే భారీ ఫీజులు చెల్లిస్తున్న కుటుంబాల నుంచి ప్రతి కార్యక్రమానికి ప్రత్యేకంగా డబ్బులు వసూలు చేయడంపై అసంతృప్తి వ్యక్తం చేస్తున్నారు.
ఈ తరహా అదనపు వసూళ్లపై విద్యాశాఖ అధికారులు దృష్టి సారించాలని, ప్రైవేట్, ఇంటర్నేషనల్ స్కూళ్ల ఫీజుల వ్యవహారంలో స్పష్టమైన మార్గదర్శకాలు అమలు చేయాలని తల్లిదండ్రులు డిమాండ్ చేస్తున్నారు. మరి ఈ వ్యవహారంపై తెలంగాణ విద్యాశాఖ అధికారులు ఎలాంటి చర్యలు తీసుకుంటారో వేచి చూడాలి.