D News: Nov 2: Traffic Restrictions: హైదరాబాద్‌లో నేడు ట్రాఫిక్ ఆంక్షలు.. పలు మార్గాల్లో వాహనాల మళ్లింపు
భారతీయ జనతా పార్టీ (BJP) ఆధ్వర్యంలో సోమవారం హైదరాబాద్ నగరంలో భారీ పాదయాత్ర నిర్వహించనున్నారు. బీజేఆర్ విగ్రహం నుంచి ఎంజే మార్కెట్ వరకు ఈ పాదయాత్ర కొనసాగనుంది. ఈ నేపథ్యంలో నగరంలో ట్రాఫిక్ రద్దీని నియంత్రించేందుకు హైదరాబాద్ ట్రాఫిక్ పోలీసులు ప్రత్యేక ఆంక్షలు, మళ్లింపులు ప్రకటించారు. మధ్యాహ్నం 1 గంట నుంచి రాత్రి 7 గంటల వరకు పరిస్థితిని బట్టి ఈ ఆంక్షలు అమల్లో ఉంటాయని అధికారులు తెలిపారు.
బషీర్‌బాగ్, లిబర్టీ, రవీంద్రభారతి, బీజేఆర్ విగ్రహం, ఎంజే మార్కెట్, అబిడ్స్, నాంపల్లి, జీపీఓ, అఫ్జల్‌గంజ్ తదితర ప్రాంతాల్లో భారీగా ట్రాఫిక్ రద్దీ ఏర్పడే అవకాశం ఉంది. ఈ మార్గాల్లో ప్రయాణించే వాహనదారులు ముందుగానే తమ ప్రయాణ ప్రణాళికలను సిద్ధం చేసుకోవాలని ట్రాఫిక్ పోలీసులు సూచించారు.
ప్రధాన ట్రాఫిక్ మళ్లింపులు ఇవే
ఏఆర్ పెట్రోల్ పంప్ వైపు నుంచి బీజేఆర్ విగ్రహం వైపు వచ్చే వాహనాలను నాంపల్లి రైల్వే స్టేషన్, రవీంద్రభారతి వైపు మళ్లించనున్నారు. జాంబాగ్, అఫ్జల్‌గంజ్ నుంచి జీపీఓ వైపు వచ్చే వాహనాలను ఎంజే మార్కెట్ వద్ద తాజ్ ఐలాండ్ వైపు దారి మళ్లిస్తారు.
అదేవిధంగా తాజ్ ఐలాండ్ నుంచి ఓల్డ్ ఏబీసీ లేన్, యూసుఫ్ అండ్ కంపెనీ, ట్రూప్ బజార్ మీదుగా బ్యాంక్ స్ట్రీట్ వైపు వెళ్లే వాహనాలను ఎంజే మార్కెట్ వద్ద అఫ్జల్‌గంజ్ వైపు మళ్లించనున్నారు. ఓల్డ్ అంబేద్కర్ విగ్రహం వద్ద బీజేఆర్ విగ్రహం వైపు వెళ్లే వాహనాలను లిబర్టీ నుంచి హిమాయత్‌నగర్ వైపు మళ్లిస్తారు. హిమాయత్‌నగర్ నుంచి వచ్చే వాహనాలను లిబర్టీ వద్ద ట్యాంక్‌బండ్ వైపు పంపిస్తారు.
బషీర్‌బాగ్ జంక్షన్ వద్ద రాజారెడ్డి మార్గ్, ఓల్డ్ ఎమ్మెల్యే క్వార్టర్స్ నుంచి వచ్చే వాహనాలను హైదరాబాద్ ట్రాఫిక్ పోలీస్ కాంప్లెక్స్ వైపు మళ్లిస్తారు. ఏఆర్ పెట్రోల్ పంప్, నాంపల్లి నుంచి చాపెల్ రోడ్, సుజాత స్కూల్ జంక్షన్ వైపు వెళ్లే వాహనాలను చాపెల్ రోడ్ టీ జంక్షన్ వద్ద నాంపల్లి వైపు దారి మళ్లించనున్నారు.
కింగ్‌కోఠి జంక్షన్ నుంచి తాజ్ మహల్ హోటల్, అబిడ్స్ వైపు వెళ్లే వాహనాలను బషీర్‌బాగ్, బొగ్గులకుంట వైపు పంపిస్తారు. బొగ్గులకుంట నుంచి బాటా టీ జంక్షన్, అబిడ్స్ వైపు వాహనాలకు అనుమతి ఉండదు. అలాగే జీపీఓ నుంచి ఎంజే మార్కెట్ వైపు వాహనాల రాకపోకలను నిలిపివేయనున్నారు. ఎంజే మార్కెట్ నుంచి నాంపల్లి స్టేషన్ రోడ్ వైపు వెళ్లే వాహనాలను నాంపల్లి వైపు మళ్లిస్తారు.
ఈ జంక్షన్ల వైపు వెళ్లకపోవడం మంచిది
మధ్యాహ్నం 1 గంట నుంచి రాత్రి 7 గంటల వరకు వాహనదారులు కొన్ని ప్రధాన ప్రాంతాలకు వెళ్లకుండా ప్రత్యామ్నాయ మార్గాలను ఎంచుకోవాలని పోలీసులు సూచించారు. లిబర్టీ, రవీంద్రభారతి, హైదరాబాద్ ట్రాఫిక్ పోలీస్ జంక్షన్, ఏఆర్ పెట్రోల్ పంప్, బషీర్‌బాగ్, బీజేఆర్ విగ్రహం సర్కిల్, ఎస్‌బీఐ గన్‌ఫౌండ్రి, జీపీఓ, నాంపల్లి టీ జంక్షన్ ప్రాంతాల్లో ట్రాఫిక్ ఆంక్షలు ఉండనున్నాయి.
అలాగే తాజ్ ఐలాండ్, ఎంజే మార్కెట్, అఫ్జల్‌గంజ్, జాంబాగ్ ప్రాంతాల్లోనూ రద్దీ ఎక్కువగా ఉండే అవకాశం ఉంది. అత్యవసరమైతే తప్ప ఈ మార్గాల్లో ప్రయాణించకపోవడం మంచిదని ట్రాఫిక్ పోలీసులు సూచిస్తున్నారు.
ఆర్టీసీ బస్సుల రాకపోకల్లో మార్పులు
పాదయాత్ర నేపథ్యంలో ఆర్టీసీ బస్సుల రూట్లలోనూ మార్పులు చేశారు. రవీంద్రభారతి నుంచి బీజేఆర్ విగ్రహం వైపు వెళ్లే బస్సులను ఏఆర్ పెట్రోల్ పంప్ వద్ద నాంపల్లి రైల్వే స్టేషన్ వైపు మళ్లించనున్నారు. ఎంజే మార్కెట్ నుంచి జీపీఓ వైపు వెళ్లే బస్సులను తాజ్ ఐలాండ్ వైపు దారి మళ్లిస్తారు.
అప్పర్ ట్యాంక్‌బండ్, ఓల్డ్ అంబేద్కర్ విగ్రహం నుంచి లిబర్టీ వైపు వచ్చే బస్సులను తెలుగు తల్లి జంక్షన్, ఇక్బాల్ మినార్, రవీంద్రభారతి మీదుగా నడపనున్నారు. వివిధ జిల్లాల నుంచి రాణిగంజ్, అప్పర్ ట్యాంక్‌బండ్ వైపు వచ్చే బస్సులను సీటీఓ జంక్షన్ వద్ద రసూల్‌పురా, బేగంపేట వైపు మళ్లించనున్నారు.
ప్రయాణికులకు ట్రాఫిక్ పోలీసుల కీలక సూచనలు
నాంపల్లి, కాచిగూడ రైల్వే స్టేషన్లకు వెళ్లే ప్రయాణికులు ట్రాఫిక్ రద్దీని దృష్టిలో ఉంచుకుని సాధారణ సమయం కంటే ముందుగానే బయలుదేరాలని పోలీసులు సూచించారు. విమానాశ్రయానికి వెళ్లే ప్రయాణికులు కూడా ట్రాఫిక్ జామ్ కారణంగా ఆలస్యం కాకుండా ముందస్తు ప్రణాళికతో ప్రయాణించాలి.
పాఠశాలల నుంచి పిల్లలను తీసుకెళ్లే తల్లిదండ్రులు ప్రత్యామ్నాయ మార్గాలను ఎంచుకోవాలని సూచించారు. ప్రయాణ సమయంలో అత్యవసర సహాయం లేదా ఏదైనా ఇబ్బంది ఎదురైతే ట్రాఫిక్ పోలీసుల హెల్ప్‌లైన్ నంబర్ 9010203626ను సంప్రదించవచ్చని అధికారులు తెలిపారు.