ఇంటర్‌ మూల్యాంకనంలో తప్పులకు జరిమానా పెంపు

D Educt: Oct 24: ఇంటర్‌ జవాబుపత్రాల మూల్యాంకనంలో తప్పులకు జరిమానా 25% పెంపు

ఇంటర్మీడియట్‌ పబ్లిక్‌ పరీక్షల జవాబుపత్రాల మూల్యాంకనంలో చేసే తప్పులకు విధించే జరిమానాను ప్రస్తుతమున్న దానికంటే అదనంగా 25 శాతం పెంచుతూ ఇంటర్‌ విద్యామండలి ఆదేశాలు జారీ చేసింది. గత నెలలో నిర్వహించిన బోర్డు సమావేశంలో ఈ మేరకు నిర్ణయం తీసుకున్నట్లు తాజాగా వెల్లడించింది. జరిమానా పెంపునకు సంబంధించిన వివరాలను మూల్యాంకన విధులకు హాజరయ్యే అధ్యాపకులకు తెలియజేయాలని కళాశాలల ప్రిన్సిపాళ్లను ఆదేశించింది. పరీక్ష ఫలితాల విడుదల అనంతరం రీకౌంటింగ్‌, రీవెరిఫికేషన్‌ సమయంలో గుర్తించిన తప్పుల ఆధారంగా జరిమానాలను అమలు చేయనున్నారు.

ఫెయిల్‌ నుంచి పాస్‌ అయితే భారీ జరిమానా

మూల్యాంకనం అనంతరం విడుదల చేసిన ఫలితాల్లో ఫెయిల్‌ అయిన విద్యార్థి రీకౌంటింగ్‌, రీవెరిఫికేషన్‌లో ఉత్తీర్ణత సాధిస్తే పెరిగిన మార్కుల ఆధారంగా సంబంధిత ఎగ్జామినర్‌, స్క్రూటినైజర్‌పై జరిమానా విధిస్తారు. ఫెయిల్‌ అయిన విద్యార్థికి 1 నుంచి 10 మార్కులు పెరిగి పాస్‌ అయితే ఎగ్జామినర్‌కు ప్రస్తుతం ఉన్న రూ.7,500 జరిమానాను రూ.9,375కు పెంచారు. స్క్రూటినైజర్‌కు ఉన్న రూ.3,750 జరిమానాను రూ.4,688కు పెంచుతూ నిర్ణయం తీసుకున్నారు.

మార్కుల వ్యత్యాసాన్ని బట్టి డీబార్‌

ఫెయిల్‌ నుంచి పాస్‌ అయిన విద్యార్థికి 11 నుంచి 20 మార్కులు పెరిగితే ఎగ్జామినర్‌కు జరిమానా విధించడంతో పాటు ఏడాది పాటు మూల్యాంకన విధుల నుంచి డీబార్‌ చేస్తారు. 21 నుంచి 30 మార్కుల వ్యత్యాసం ఉంటే జరిమానాతో పాటు రెండేళ్ల పాటు, 31 మార్కులకు పైగా వ్యత్యాసం ఉంటే జరిమానాతో పాటు మూడేళ్ల పాటు మూల్యాంకన విధుల నుంచి డీబార్‌ చేయనున్నారు.

పాస్‌ లేదా ఫెయిల్‌ స్థితి మారకపోయినా జరిమానా

విద్యార్థి పాస్‌ నుంచి పాస్‌ లేదా ఫెయిల్‌ నుంచి ఫెయిల్‌గానే కొనసాగుతూ మార్కుల్లో వ్యత్యాసం వచ్చిన సందర్భాల్లోనూ నిర్దేశిత నిబంధనల ప్రకారం జరిమానాలు విధించనున్నారు. 1 నుంచి 5 మార్కుల వరకు వ్యత్యాసం ఉంటే ఎలాంటి జరిమానా ఉండదు. అయితే, 6 నుంచి 10 మార్కుల వ్యత్యాసానికి ఎగ్జామినర్‌కు విధించే జరిమానాను రూ.3,000 నుంచి రూ.3,750కు పెంచారు. 11 నుంచి 20 మార్కుల వ్యత్యాసానికి జరిమానాను రూ.4,500 నుంచి రూ.5,625కు పెంచడంతో పాటు ఏడాది పాటు మూల్యాంకన విధుల నుంచి డీబార్‌ చేయనున్నారు.

అధిక మార్కుల వ్యత్యాసానికి మరింత కఠిన చర్యలు

మార్కుల వ్యత్యాసం 21 నుంచి 30 మధ్య ఉంటే ఎగ్జామినర్‌కు రూ.7,500 జరిమానా విధించడంతో పాటు రెండేళ్ల పాటు మూల్యాంకన విధుల నుంచి డీబార్‌ చేస్తారు. 31 మార్కులకు పైగా వ్యత్యాసం ఉంటే రూ.9,375 జరిమానా విధించి, మూడేళ్ల పాటు డీబార్‌ చేయనున్నారు. మూల్యాంకనంలో నిర్లక్ష్యం, తప్పిదాలను తగ్గించి విద్యార్థులకు సరైన మార్కులు అందించాలనే ఉద్దేశంతో ఇంటర్‌ విద్యామండలి ఈ చర్యలు చేపట్టింది.