D Spiritual: Oct 15: చిన్న పిల్లల నుంచి పెద్దవారి వరకు అందరూ ఎంతో ఇష్టంగా జరుపుకునే బతుకమ్మ పండుగ రానే వచ్చింది. అక్టోబర్ 18, ఆదివారం రోజున ప్రజలు ఈ పండుగను ఘనంగా జరుపుకోనున్నారు. అయితే బతుకమ్మను పేర్చాలంటే పూల కోసం భారీగా ఖర్చు చేయాల్సి వస్తోంది. కానీ కొన్ని చిన్న చిట్కాలు పాటిస్తే రూపాయి కూడా ఖర్చు చేయకుండా అందమైన బతుకమ్మను పేర్చుకోవచ్చు. అదెలాగో ఇప్పుడు తెలుసుకుందాం.
ప్రస్తుతం బతుకమ్మను పేర్చేందుకు చాలామంది మార్కెట్లలో డబ్బులు పెట్టి పూలను కొనుగోలు చేస్తున్నారు. పండుగ సమయం కావడంతో పూల ధరలు కూడా ఆకాశాన్నంటుతున్నాయి. కిలో బంతిపూల ధర రూ.400 వరకు ఉండగా, చామంతి పూల ధర కిలోకు రూ.500కు పైగా పలుకుతోంది. దీంతో సామాన్యులు బతుకమ్మను పేర్చాలంటేనే ఆలోచించాల్సిన పరిస్థితి ఏర్పడింది. అయితే ప్రకృతిలో సహజంగా లభించే పూలను ఉపయోగిస్తే ఖర్చును గణనీయంగా తగ్గించుకోవచ్చు.
పూర్వకాలంలో ఎక్కువగా తంగేడు పూలతోనే బతుకమ్మను పెద్దగా పేర్చేవారు. గ్రామీణ ప్రాంతాల్లో పొలాల గట్లు, చెరువుల పరిసరాల్లో తంగేడు మొక్కలు విరివిగా కనిపిస్తాయి. ఈ పూలను సేకరించి బతుకమ్మలో ఉపయోగించుకోవచ్చు. పసుపు రంగులో ఉండే తంగేడు పూలను రెండు మూడు వరుసల్లో పేర్చడం వల్ల బతుకమ్మ అందంగా కనిపిస్తుంది. దీంతో బంతిపూలను ఎక్కువగా కొనుగోలు చేయాల్సిన అవసరం ఉండదు.
అలాగే గ్రామీణ ప్రాంతాల్లో రోడ్ల వెంట, పొలాల పరిసరాల్లో నందివర్ధనం, ముత్యాల పూలు, గునుగు పూలు వంటి పూలు కూడా లభిస్తుంటాయి. గతంలో బతుకమ్మ పండుగ కోసం ప్రత్యేకంగా ఒక రోజు కేటాయించి, ప్రకృతిలో దొరికే పూలను సేకరించేవారు. ఇప్పటికీ గ్రామీణ ప్రాంతాల్లో గునుగు పూలు అందుబాటులో ఉంటాయి. వీటిని సేకరించి ఇతర సహజసిద్ధమైన పూలతో కలిపి బతుకమ్మను పేర్చుకుంటే ఖర్చు తగ్గడమే కాకుండా సంప్రదాయ పద్ధతిలో పండుగను జరుపుకోవచ్చు.
ఇక చాలామంది ఇళ్లలోనే వివిధ రకాల పూలు అందుబాటులో ఉంటాయి. గోరింట పూలు, గుమ్మడి పూలు, బీరకాయ పూలు, సోరకాయ పూలు, గడ్డి పూలు, ముద్దమందారం వంటి పూలను కూడా బతుకమ్మ అలంకరణకు ఉపయోగించుకోవచ్చు. ఇంటి పరిసరాల్లో, తోటల్లో లభించే పూలను సేకరించి అందంగా పేర్చుకుంటే మార్కెట్‌లో ఎక్కువ డబ్బులు పెట్టి పూలను కొనాల్సిన అవసరం ఉండదు. ఇలా ప్రకృతిలో లభించే పూలతో బతుకమ్మను పేర్చుకోవడం ద్వారా ఖర్చును తగ్గించుకోవడంతో పాటు పండుగ సంప్రదాయాన్ని కూడా కొనసాగించవచ్చు.