D Spiritual: Sept 26: గణేష్ నిమజ్జన వేడుకలపై రేణూ దేశాయ్ వ్యాఖ్యలు
గణేష్ నిమజ్జన వేడుకల్లో డీజేల హోరు, మద్యం సేవించి రోడ్లపై హంగామా చేయడంపై నటి రేణూ దేశాయ్ చేసిన వ్యాఖ్యలు అప్పట్లో సోషల్ మీడియాలో చర్చకు దారితీశాయి. వినాయక చవితి సందర్భంగా అర్ధరాత్రి వరకు భారీ శబ్దాలతో ప్రజలకు ఇబ్బందులు కలిగించడాన్ని ఆమె ప్రశ్నించడంతో కొందరు ఆమెను విమర్శించారు. తాజాగా ఓ యూట్యూబ్‌ ఛానెల్‌కు ఇచ్చిన ఇంటర్వ్యూలో రేణూ దేశాయ్ మరోసారి ఈ అంశంపై స్పందించారు.
తాను హిందూ ధర్మానికి వ్యతిరేకం కాదని రేణూ దేశాయ్ స్పష్టం చేశారు. పండుగలు జరుపుకోవడాన్ని తాను ఎప్పుడూ తప్పుపట్టలేదని తెలిపారు. అయితే పండుగ పేరుతో ఇతరులకు ఇబ్బంది కలిగించేలా న్యూసెన్స్ చేయడం, అనాచారాలకు పాల్పడటాన్ని మాత్రమే తాను ప్రశ్నిస్తున్నానని పేర్కొన్నారు.
“నాకంటే సనాతన ధర్మాన్ని పాటించేవారు ఉండరు”
తనను హిందువులను టార్గెట్ చేస్తున్నారని విమర్శిస్తున్న వారికి రేణూ దేశాయ్ ఘాటుగా సమాధానమిచ్చారు. తనను విమర్శించే వారిలో తనకంటే గొప్పగా సనాతన ధర్మాన్ని పాటించేవారు ఉండరని అన్నారు. తాను రాముడు, శివుడిని అత్యంత భక్తితో పూజిస్తానని చెప్పారు.
తన ధర్మం, ఆచారాల గురించి తనకు స్పష్టమైన అవగాహన ఉన్నందుకే పండుగల నిర్వహణపై మాట్లాడుతున్నానని రేణూ దేశాయ్ తెలిపారు. ఇతర మతాల గ్రంథాలు, పద్ధతుల గురించి తనకు పూర్తి అవగాహన లేనందున వాటిపై మాట్లాడే అర్హత తనకు లేదని స్పష్టం చేశారు.
సూర్యాస్తమయంలోపే నిమజ్జనం జరగాలి
పాత పద్ధతులు, సంప్రదాయాలను గుర్తుచేస్తూ రేణూ దేశాయ్ పలు వ్యాఖ్యలు చేశారు. చిన్నప్పటి నుంచి వినాయకుడి నిమజ్జనం సాయంత్రం 6 గంటల్లోపే పూర్తిచేయాలని నేర్పించారని తెలిపారు. ఇంట్లో శుభకార్యాలు లేదా ఇతర మంచి పనులను సాధారణంగా పగటి సమయంలోనే నిర్వహించేవారని గుర్తుచేశారు.
తన చిన్నతనంలో మధ్యాహ్నం మూడున్నర గంటలకే ఇంట్లోవారు నిమజ్జనం కోసం తొందర చేసేవారని ఆమె చెప్పారు. అయితే ప్రస్తుతం కొందరు ఇష్టానుసారం డీజేలు ఏర్పాటు చేసుకుని, మద్యం సేవించి గణపతి విగ్రహం ముందు నృత్యాలు చేస్తున్నారని, ఇందులో భక్తి ఎక్కడ ఉందని ప్రశ్నించారు.
అర్ధరాత్రి వేళల్లో రోడ్లపై పెద్ద శబ్దాలు చేయడం వల్ల ఇళ్లలో ఉండే వృద్ధులు, అనారోగ్యంతో బాధపడుతున్నవారు, చిన్నపిల్లలు తీవ్ర ఇబ్బందులు ఎదుర్కొంటున్నారని రేణూ దేశాయ్ పేర్కొన్నారు. ఇతరులను ఇబ్బందులకు గురిచేసే విధంగా వ్యవహరించడం వల్ల దేవుడి ఆశీర్వాదాలు ఎలా లభిస్తాయని ఆమె ప్రశ్నించారు. మన దేవుడికి మనమే గౌరవం ఇవ్వకుండా, మర్యాద లేకుండా ప్రవర్తించడం సరికాదని ఆమె ఆవేదన వ్యక్తం చేశారు.