D Educt: Sept 23: ఉద్యోగాలను సృష్టించే విద్య.. స్కిల్ యూనివర్సిటీలతో కొత్త దిశ
ఉన్నత విద్యలో ఒకప్పుడు విద్యార్థి ఏ డిగ్రీ పొందాడనేదే ప్రధాన ప్రశ్న. ఇప్పుడు ఆ డిగ్రీతో అతను ఏ పని చేయగలడనేది కూడా అంతే ముఖ్యం. ఆర్టిఫిషియల్‌ ఇంటెలిజెన్స్‌, ఆటోమేషన్‌, రోబోటిక్స్‌, డిజిటల్‌ టెక్నాలజీ, గ్రీన్‌ ఎనర్జీ వంటి రంగాల్లో వేగంగా మార్పులు వస్తున్న నేపథ్యంలో.. విద్యార్థులకు పుస్తక జ్ఞానంతో పాటు ఆ జ్ఞానాన్ని ఉద్యోగ నైపుణ్యంగా మార్చుకునే సామర్థ్యం అవసరమవుతోంది.
ఈ నేపథ్యంలో ఆంధ్రప్రదేశ్‌లో స్కిల్ యూనివర్సిటీల ఆలోచన ప్రాధాన్యం సంతరించుకుంది. ఆంధ్రప్రదేశ్‌ ప్రైవేట్‌ స్కిల్ యూనివర్సిటీల (స్థాపన, క్రమబద్ధీకరణ) బిల్లు-2026ను రాష్ట్ర శాసనసభ ఆగస్టు 19న ఆమోదించింది. అనంతరం శాసనమండలి ఆమోదం కూడా పొందిన ఈ బిల్లు.. పరిశ్రమ అవసరాలకు అనుగుణంగా నైపుణ్య ఆధారిత విశ్వవిద్యాలయాల ఏర్పాటుకు మార్గం చూపుతోంది. గ్రీన్‌ఫీల్డ్‌, బ్రౌన్‌ఫీల్డ్‌ స్కిల్ యూనివర్సిటీలతో పాటు అర్హత కలిగిన ఐటీఐలు, పాలిటెక్నిక్‌ సంస్థలను స్కిల్ యూనివర్సిటీలుగా మార్చే అవకాశాన్ని కూడా కల్పిస్తోంది.
విద్యను పరిశ్రమ అవసరాలతో అనుసంధానం
స్కిల్ యూనివర్సిటీల్లో తరగతులు, పరీక్షలకే పరిమితం కాకుండా ప్రాక్టికల్‌ లెర్నింగ్‌, సమస్య పరిష్కారం, ఇంటర్న్‌షిప్‌, అప్రెంటిస్‌షిప్‌, ఆన్‌-ది-జాబ్‌ ట్రైనింగ్‌కు ప్రాధాన్యం ఇవ్వాలి. పరిశ్రమలను కేవలం ఉద్యోగాలు కల్పించే సంస్థలుగా కాకుండా విద్యా భాగస్వాములుగా చూడాలి. పాఠ్యప్రణాళిక రూపకల్పన, ఆధునిక పరికరాలు, సాఫ్ట్‌వేర్‌, శిక్షణా ప్రమాణాల నిర్ణయంలో పరిశ్రమల భాగస్వామ్యం ఉండాలి.
జిల్లాల స్థాయికి నైపుణ్య శిక్షణ
ఒక ప్రధాన విశ్వవిద్యాలయాన్ని అకడమిక్‌ హబ్‌గా ఉంచి వివిధ ప్రాంతాల్లో శిక్షణా కేంద్రాలను ఏర్పాటు చేసే ‘హబ్‌ అండ్‌ స్పోక్‌’ విధానం ఉపయోగపడుతుంది. పరిశ్రమలు, పోర్టులు, లాజిస్టిక్స్‌ కేంద్రాలు, తయారీ క్లస్టర్లు, ఆక్వాకల్చర్‌, వ్యవసాయ, సేవా రంగాలకు సమీపంలో శిక్షణా కేంద్రాలు ఏర్పాటు చేస్తే విద్యార్థులకు శిక్షణతో పాటు ఉద్యోగ అవకాశాలు కూడా అందుబాటులోకి వస్తాయి.
ఆంధ్రప్రదేశ్‌లో ఎలక్ట్రానిక్స్‌, సెమీకండక్టర్లు, డ్రోన్‌ టెక్నాలజీ, ఏరోస్పేస్‌, పునరుత్పాదక ఇంధనం, ఆహార ప్రాసెసింగ్‌, ఆక్వాకల్చర్‌, ఆరోగ్య సేవలు, పర్యాటకం వంటి రంగాల్లో అవకాశాలకు అనుగుణంగా కోర్సులను రూపొందించాలి. మారుతున్న ఉద్యోగ మార్కెట్‌కు అనుగుణంగా పాఠ్యప్రణాళికలను కూడా ఎప్పటికప్పుడు సవరించాల్సిన అవసరం ఉంది.
ఉద్యోగ ఫలితాలపై దృష్టి
స్కిల్ యూనివర్సిటీల విజయాన్ని కేవలం కోర్సులు పూర్తి చేసిన విద్యార్థుల సంఖ్యతో కాకుండా.. వారు ఉద్యోగాలు పొందారా, స్వయం ఉపాధిలోకి వెళ్లారా, ఎంతకాలం ఉద్యోగంలో కొనసాగారు, వారి వేతన స్థాయి ఎలా ఉంది, పరిశ్రమలు వారి నైపుణ్యాలను ఎలా అంచనా వేస్తున్నాయి వంటి అంశాలతో కొలవాలి. ప్లేస్‌మెంట్‌తో పాటు ఉద్యోగ నిలకడ, వేతనాలు, పరిశ్రమ అభిప్రాయాలను కూడా పారదర్శకంగా వెల్లడించాలి.
నాణ్యతతో పాటు అందుబాటులో విద్య
ప్రైవేట్‌ పెట్టుబడుల ద్వారా ఆధునిక మౌలిక వసతులు, పరికరాలు, పరిశ్రమ భాగస్వామ్యాలు అందుబాటులోకి వచ్చే అవకాశం ఉంది. అయితే ‘స్కిల్’ పేరుతో పాత బోధనా విధానాలనే కొనసాగించకుండా.. పరిశ్రమ భాగస్వామ్యాలు, శిక్షణా పరికరాలు, నిపుణులైన ట్రైనర్లు, అప్రెంటిస్‌షిప్‌, ప్లేస్‌మెంట్‌ వంటి అంశాలపై నిరంతర పర్యవేక్షణ అవసరం.
అలాగే స్కిల్ యూనివర్సిటీలు కేవలం అధిక ఫీజులు చెల్లించగల విద్యార్థులకే పరిమితం కాకుండా గ్రామీణ, పేద, మధ్యతరగతి విద్యార్థులకు కూడా అందుబాటులో ఉండాలి. ఆధునిక శిక్షణ, పరిశ్రమ అనుభవంలో నగర, గ్రామీణ విద్యార్థుల మధ్య అంతరం తగ్గేలా మౌలిక వసతులను అభివృద్ధి చేయాలి.
ఉద్యోగాల నుంచి ఉద్యోగాల సృష్టి వరకు
స్కిల్ యూనివర్సిటీల్లో ఉద్యోగాలకు అవసరమైన నైపుణ్యాలతో పాటు పరిశోధన, ఆవిష్కరణ, స్టార్టప్‌లు, వ్యవస్థాపకతకు కూడా ప్రాధాన్యం ఇవ్వాలి. విద్యార్థులు ఉద్యోగాలు పొందడమే కాకుండా భవిష్యత్తులో ఉద్యోగాలు సృష్టించే స్థాయికి ఎదిగేలా ప్రోత్సహించాలి.
అదే సమయంలో మారుతున్న సాంకేతికతకు అనుగుణంగా ఉద్యోగులు, పరిశ్రమ సిబ్బంది, స్వయం ఉపాధి పొందేవారు, కొత్త రంగాల్లోకి మారాలనుకునేవారికి రీస్కిల్లింగ్‌, అప్‌స్కిల్లింగ్‌ అవకాశాలు కల్పించాలి. సర్టిఫికెట్‌, డిప్లొమా, డిగ్రీ, మైక్రో క్రెడెన్షియల్స్‌, క్రెడిట్‌ బ్యాంకింగ్‌ వంటి విధానాలు ఈ నిరంతర అభ్యాసానికి ఉపయోగపడతాయి. మొత్తంగా విద్యను ఉద్యోగానికి అనుసంధానించడమే కాకుండా.. ఉద్యోగాలను సృష్టించే స్థాయికి విద్యార్థులను తీర్చిదిద్దడమే స్కిల్ యూనివర్సిటీల అసలు లక్ష్యంగా ఉండాలి.