D Spiritual: Sept 22: నగరంలో అత్యంత వైభవంగా జరుగుతున్న వినాయక చవితి ఉత్సవాలు ప్రస్తుతం ముగింపు దశకు చేరుకున్నాయి. ప్రసిద్ధ ఖైరతాబాద్ మహా గణపతితో పాటు హైదరాబాద్లోని వివిధ ప్రాంతాల్లో ప్రతిష్ఠించిన వినాయక విగ్రహాల సామూహిక నిమజ్జన కార్యక్రమాన్ని ఈ నెల 25న శుక్రవారం అత్యంత ఘనంగా నిర్వహించేందుకు అధికారులు ఏర్పాట్లు చేస్తున్నారు. ఆ రోజు ఉదయాన్నే బడా గణేశుడిని శోభాయాత్రగా తరలించి, మధ్యాహ్నం 12 గంటలలోపు నిమజ్జన కార్యక్రమాన్ని పూర్తి చేయాలని ప్రణాళిక రూపొందించారు.
నిమజ్జన ఏర్పాట్లు, భద్రతా చర్యల నేపథ్యంలో ఖైరతాబాద్ మహా గణపతి దర్శనానికి బుధవారం ఈ నెల 23 రాత్రి వరకు మాత్రమే భక్తులను అనుమతించనున్నారు. ఆ తర్వాత భక్తులకు దర్శనానికి అవకాశం ఉండదని ఉత్సవ కమిటీ ప్రతినిధులు, పోలీసులు స్పష్టం చేశారు. నిమజ్జనానికి అవసరమైన ఏర్పాట్లలో భాగంగా గురువారం ఉదయం నుంచే గణేశ్ మండపం వద్ద ఏర్పాటు చేసిన షెడ్లు, బ్యారికేడ్లను తొలగించే ప్రక్రియ ప్రారంభించనున్నారు.
దర్శనానికి మరో రెండు రోజులు మాత్రమే గడువు ఉండటంతో భక్తులు పెద్ద సంఖ్యలో ఖైరతాబాద్కు తరలివచ్చి మహా గణపతిని దర్శించుకోవాలని ఉత్సవ కమిటీ సూచించింది. భక్తుల రద్దీని దృష్టిలో ఉంచుకుని పోలీసులు కూడా ప్రత్యేక భద్రతా ఏర్పాట్లు చేస్తున్నారు.
ఈ ఏడాది ఖైరతాబాద్ మహా గణపతిని 69 అడుగుల ఎత్తులో పంచముఖ సంకటహర మహా గణపతి రూపంలో ప్రతిష్ఠించారు. వినాయక చవితి ఉత్సవాల్లో ప్రత్యేక ఆకర్షణగా నిలిచిన ఈ మహా గణపతిని దర్శించుకునేందుకు ప్రతిరోజూ వేలాది మంది భక్తులు తరలివస్తున్నారు.
నిమజ్జన రోజైన శుక్రవారం ఉదయం 6 గంటలకు మహా గణపతి వాహనాన్ని కదిలించి శోభాయాత్రను ప్రారంభించనున్నారు. మధ్యాహ్నం 12 గంటలలోపు శోభాయాత్రను పూర్తి చేసి, నిమజ్జన కార్యక్రమాన్ని కూడా పూర్తిచేసేలా అధికారులు, ఉత్సవ కమిటీ పకడ్బందీ ఏర్పాట్లు చేస్తున్నారు.