D News: ప్రభాస్, హను రాఘవపూడి కాంబినేషన్లో తెరకెక్కుతున్న **‘ఫౌజీ’**పై భారీ అంచనాలు ఉన్నాయి. 1940ల కాలం నేపథ్యంలో సాగే ఈ పీరియాడిక్ యాక్షన్ డ్రామాలో ప్రభాస్ సైనికుడిగా కనిపించనున్నారు. ఇమాన్వి హీరోయిన్గా నటిస్తున్న ఈ సినిమాను మైత్రీ మూవీ మేకర్స్ భారీ స్థాయిలో నిర్మిస్తోంది.
మేకర్స్ ఇప్పటికే డిసెంబర్ 3, 2026న సినిమాను ప్రపంచవ్యాప్తంగా విడుదల చేయనున్నట్లు ప్రకటించారు. అయితే సినిమా పనులు ఇంకా కొనసాగుతున్న నేపథ్యంలో రిలీజ్ వాయిదా పడొచ్చనే ప్రచారం మొదలైంది. ముఖ్యంగా భారీ యాక్షన్ సన్నివేశాలు, విజువల్ ఎఫెక్ట్స్ పనులు పూర్తిచేయాల్సి ఉండటంతో క్వాలిటీ కోసం మరింత సమయం తీసుకుంటారనే టాక్ వినిపిస్తోంది.
వాయిదా పడితే ‘ఫౌజీ’ సంక్రాంతి రేసులోకి వచ్చే అవకాశం ఉందనే చర్చ కూడా జరుగుతోంది. అయితే ఇది ప్రస్తుతం కేవలం ఇండస్ట్రీలో వినిపిస్తున్న ప్రచారం మాత్రమే. అధికారికంగా వాయిదాపై ఎలాంటి ప్రకటన రాలేదు. పైగా నిర్మాత వై. రవిశంకర్ ఇటీవల డిసెంబర్ 3 రిలీజ్పై వస్తున్న ఊహాగానాలను కొట్టిపారేశారు.
ఇక ‘ఫౌజీ’ వాయిదా పడుతుందనే వార్తల నేపథ్యంలో డిసెంబర్లో ఖాళీ అయ్యే అవకాశం ఉన్న స్లాట్పై మరికొన్ని సినిమాల మేకర్స్ ఆసక్తి చూపుతున్నట్లు టాక్. అయితే ‘ఫౌజీ’ వాయిదాపై అధికారిక క్లారిటీ వచ్చే వరకు ఈ వార్తలను ఖరారైన సమాచారంగా చూడలేం.
ప్రభాస్ సినిమాలకు వాయిదాలు కొత్తేమీ కాకపోవడంతో ఈసారి కూడా అదే జరుగుతుందా? అనే ఆసక్తి అభిమానుల్లో నెలకొంది. మరి ‘ఫౌజీ’ డిసెంబర్ 3కే వస్తుందా.. లేక సంక్రాంతికి వెళ్తుందా అనేది మేకర్స్ అధికారిక ప్రకటనతోనే తేలనుంది.