D Spiritual: Sept 8: 2026లో 12 రోజుల పాటు వినాయక చవితి వేడుకలు.. తొమ్మిదేళ్ల తర్వాత అరుదైన విశేషం
లంబోదరుడి ఆగమనం కోసం దేశవ్యాప్తంగా భక్తులు ఆసక్తిగా ఎదురుచూస్తున్నారు. సాధారణంగా వినాయక చవితి భాద్రపద శుద్ధ చవితి రోజున ప్రారంభమై పది రోజుల పాటు కొనసాగి, అనంత చతుర్దశి రోజున నిమజ్జనంతో ముగుస్తుంది. అయితే ఈ ఏడాది గణపతి ఉత్సవాలు 12 రోజుల పాటు జరగనున్నాయి.
వేద పంచాంగ గణితం ప్రకారం ఈసారి భాద్రపద శుక్ల చవితి సెప్టెంబర్ 14న, అనంత చతుర్దశి సెప్టెంబర్ 25న రానుంది. దీంతో చవితి నుంచి నిమజ్జనం వరకు మొత్తం 12 రోజుల వ్యవధి ఏర్పడుతోంది. తిథుల నిడివిలో వచ్చే మార్పులే ఇందుకు ప్రధాన కారణంగా చెబుతున్నారు.
చంద్రుడి గమనాన్ని బట్టి తిథుల వ్యవధిలో హెచ్చుతగ్గులు చోటుచేసుకుంటాయి. ఒక తిథి రెండు సూర్యోదయాల వరకు కొనసాగినప్పుడు తిథి వృద్ధి ఏర్పడుతుంది. ఈసారి అలాంటి కాలగణన కారణంగానే వినాయక ఉత్సవాల వ్యవధి 12 రోజులకు పెరిగింది. ఇలాంటి పరిస్థితి ప్రతి ఏడాది ఏర్పడదు.
గతంలో 2017లో కూడా ఇదే తరహాలో 12 రోజుల పాటు వినాయక ఉత్సవాలు జరిగాయి. అయితే ఇది ఖచ్చితమైన తొమ్మిదేళ్ల చక్రం కాదని పంచాంగ నిపుణులు చెబుతున్నారు. చంద్రమాన, సౌరమాన కాలగణనల మధ్య సర్దుబాట్ల కారణంగా ఇలాంటి అరుదైన తిథి విన్యాసాలు ఏర్పడతాయి.
గణపతి ఉత్సవాలు పది రోజుల పాటు నిర్వహించే సంప్రదాయం వెనుక పురాణ గాథ కూడా ఉంది. వేదవ్యాసుడు మహాభారతాన్ని చెబుతుండగా, గణపతి పది రోజుల పాటు దానిని లిఖించాడని, అనంత చతుర్దశి రోజున నిమజ్జనం ద్వారా ఆయనకు శాంతి కలిగించారని పురాణ విశ్వాసం.
ఇక 1893లో లోకమాన్య బాలగంగాధర తిలక్ గణపతి పూజను సార్వజనిక ఉత్సవంగా మార్చడంతో ఈ వేడుకలు మరింత విస్తరించాయి. ఈసారి రెండు రోజులు అదనంగా గణనాథుడి సేవలో గడిపే అవకాశం రావడంతో భక్తుల్లో ఉత్సాహం నెలకొంది. దేశవ్యాప్తంగా ప్రముఖ గణేష్ మండపాల్లో ప్రత్యేక పూజలు, సాంస్కృతిక కార్యక్రమాలు, అన్నదానాలకు కమిటీలు ఏర్పాట్లు చేస్తున్నాయి.