KTR: కేసీఆర్‌కు రాజీనామాలు కొత్త కాదు.. ప్రత్యేక రాష్ట్రం కోసం ఆయన రాజీనామా చేశారు
తెలంగాణ ఉద్యమ నాయకుడు, బీఆర్‌ఎస్‌ అధినేత కేసీఆర్‌కు రాజీనామాలు చేయడం కొత్తేమీ కాదని మాజీ మంత్రి కేటీఆర్‌ అన్నారు. కేసీఆర్ రాజీనామా చేయడం వల్లే కేంద్రం ప్రత్యేక తెలంగాణ రాష్ట్ర ఏర్పాటుపై నిర్ణయం తీసుకుందని ఆయన పేర్కొన్నారు.
బుధవారం మాజీ మంత్రి హరీశ్‌రావుతో కలిసి సీఎం రేవంత్‌రెడ్డి 1000 రోజుల పాలనపై తెలంగాణ భవన్‌లో ‘ఛార్జ్‌షీట్‌’ను విడుదల చేసిన అనంతరం కేటీఆర్‌ మీడియాతో మాట్లాడారు.
ఈ సందర్భంగా సీఎం రేవంత్‌రెడ్డి పదేపదే కేసీఆర్ రాజీనామా చేయాలని కోరుతున్నారని కేటీఆర్‌ పేర్కొన్నారు. ఈ వ్యాఖ్యలు సందర్భోచితంగా లేవని తాను భావిస్తున్నట్లు ఆయన అన్నారు. తెలంగాణ ఉద్యమ సమయంలో కేసీఆర్ చేసిన రాజీనామాలను, రాష్ట్ర సాధనలో ఆయన పోషించిన పాత్రను కేటీఆర్‌ ఈ సందర్భంగా ప్రస్తావించారు.
కేసీఆర్ రాజీనామాతో ఢిల్లీ గడగడా వణికిందని విమర్శించారు. ఆయన రాజీనామాతో తెలంగాణ ఉద్యమం తీవ్రరూపం దాల్చడంతో, పరిస్థితిని తట్టుకోలేక అప్పటి కాంగ్రెస్‌ అధినేత్రి సోనియా గాంధీ తెలంగాణ రాష్ట్రాన్ని ఇచ్చారని అన్నారు. కేసీఆర్ రాజీనామానే తెలంగాణ రాష్ట్ర ఏర్పాటుకు కీలక కారణమని పేర్కొన్నారు. అలాంటి కేసీఆర్‌ను విమర్శించే అర్హత రేవంత్ రెడ్డికి ఉందా? అని సూటిగా ప్రశ్నించారు. పనికిమాలిన మాటలు చెప్పడం మానేసి, ప్రజలకు ఉపయోగపడే పనులు చేయాలని హితవు పలికారు.