సైబర్ కేటుగాళ్లు రెచ్చిపోతున్నారు. సీనియర్ సిటిజన్లను టార్గెట్ చేసి మోసాలకు పాల్పడుతున్నారు. హైదరాబాద్‌ పోలీస్‌ కమిషనరేట్‌ పరిధిలో గత 19 నెలల్లో 60 ఏళ్లు పైబడిన సీనియర్ సిటిజన్లు సైబర్ మోసాల్లో రూ.102 కోట్లు నష్టపోయారు. మొత్తం 403 కేసులు నమోదయ్యాయి. ఇందులో 113 ట్రేడింగ్‌ మోసాల్లో రూ.55 కోట్లు, 69 డిజిటల్‌ అరెస్ట్‌ కేసుల్లో రూ.31 కోట్లు పోయాయి. నకిలీ ట్రేడింగ్‌ యాప్‌లు, వాట్సాప్‌, టెలిగ్రామ్‌, పోలీసుల పేరుతో వీడియో కాల్స్‌ ద్వారా నేరగాళ్లు వృద్ధులను మోసం చేస్తున్నారు. మోసం జరిగిన వెంటనే ఫిర్యాదు చేస్తే గోల్డెన్‌ అవర్‌లో ఖాతాలను ఫ్రీజ్‌ చేసి నిధుల రికవరీకి అవకాశం ఉంటుందని పోలీసులు చెబుతున్నారు.
హైదరాబాద్‌ నగరంలో సైబర్ నేరగాళ్లు సీనియర్ సిటిజన్లను లక్ష్యంగా చేసుకుని భారీగా డబ్బులు కొల్లగొడుతున్నారు. హైదరాబాద్‌ పోలీస్‌ కమిషనరేట్‌ పరిధిలో గత 19 నెలల్లో 60 ఏళ్లు పైబడిన వృద్ధులు సైబర్ మోసాల బారిన పడి ఏకంగా రూ.102 కోట్లు నష్టపోయారు. ట్రేడింగ్‌ మోసాలు, డిజిటల్‌ అరెస్ట్‌ పేరుతో జరుగుతున్న మోసాలే ఇందులో అత్యధికంగా ఉన్నట్లు పోలీసులు వెల్లడించారు. ఈ కాలంలో సీనియర్ సిటిజన్ల ఫిర్యాదుల ఆధారంగా మొత్తం 403 సైబర్ క్రైమ్‌ కేసులు నమోదయ్యాయి. ట్రేడింగ్‌ మోసాల్లో సీనియర్ సిటిజన్లు భారీగా కోల్పోయారు. 113 కేసుల్లో బాధితులు సుమారు రూ.55 కోట్లు నష్టపోయినట్లు పోలీసులు తెలిపారు. వాట్సాప్‌, టెలిగ్రామ్‌ వంటి సామాజిక మాధ్యమాల్లో నేరగాళ్లు బాధితులను సంప్రదించి ఫారెక్స్‌, స్టాక్‌ మార్కెట్‌ ట్రేడింగ్‌లో భారీ లాభాలు వస్తాయని నమ్మిస్తున్నారు. ఇందుకోసం నకిలీ ట్రేడింగ్‌ యాప్‌లను ఉపయోగిస్తున్నారు.
మొదట చిన్న మొత్తాల్లో లాభాలు వచ్చినట్లు చూపిస్తూ బాధితుల్లో నమ్మకం కలిగిస్తున్నారు. ఆ తర్వాత నకిలీ యాప్‌లో భారీ లాభాలు వచ్చినట్లు డ్యాష్‌బోర్డులో చూపించి, డబ్బు ఉపసంహరించుకోవాలంటే ప్రాసెసింగ్‌ ఫీజు, ట్యాక్స్‌, విత్‌డ్రాయల్‌ చార్జీలు చెల్లించాలని కోరుతున్నారు. బాధితులు మరింత డబ్బు చెల్లించిన తర్వాత నిందితులు అదృశ్యమవుతున్నారు. డిజిటల్‌ అరెస్ట్‌ మోసాలు కూడా సీనియర్ సిటిజన్లను తీవ్రంగా నష్టపోయేలా చేస్తున్నాయి. 69 కేసుల్లో బాధితులు రూ.31 కోట్లు కోల్పోయినట్లు పోలీసులు తెలిపారు. పోలీసు అధికారులు, సీబీఐ, కస్టమ్స్‌, న్యాయస్థానాల పేర్లను ఉపయోగించి బాధితులను భయపెట్టి వీడియో కాల్స్‌లో విచారిస్తున్నట్లు నటిస్తున్నారు. అనంతరం కేసు నుంచి బయటపడేందుకు డబ్బు చెల్లించాలని ఒత్తిడి తెస్తున్నారు.
2025తో పోలిస్తే సైబర్ మోసాల కేసుల సంఖ్య తగ్గుముఖం పట్టినట్లు పోలీసులు తెలిపారు. 2025లో సీనియర్ సిటిజన్ల నుంచి 285 కేసులు నమోదై మొత్తం రూ.71 కోట్ల నష్టం జరిగింది. నెలకు సగటున 24 కేసులు నమోదయ్యాయి. 2026 జులై వరకు 118 కేసులు నమోదవగా.. బాధితులు రూ.30 కోట్లు నష్టపోయారు. నెలవారీ కేసుల సగటు 17కు తగ్గింది. అయితే మోసానికి గురైన వెంటనే పోలీసులకు సమాచారం ఇవ్వడం ద్వారా డబ్బును కాపాడుకునే అవకాశం ఉందని అధికారులు చెబుతున్నారు. గోల్డెన్‌ అవర్‌లో ఫిర్యాదు చేస్తే సైబర్ క్రైమ్‌ సిబ్బంది వేగంగా స్పందించి మోసగాళ్ల బ్యాంకు ఖాతాలను ఫ్రీజ్‌ చేయడంతోపాటు నిధుల రికవరీకి చర్యలు తీసుకుంటున్నారని తెలిపారు. తెలియని వ్యక్తుల పెట్టుబడి, ఉద్యోగ, పోలీసు విచారణ ఆఫర్లకు స్పందించకుండా, అనుమానం వచ్చిన వెంటనే పోలీసులను సంప్రదించాలన్నారు.