DNews: July06: తెలంగాణలో ప్రభుత్వ ఉద్యోగాల భర్తీ ప్రక్రియ మరోసారి వేగం అందుకుంది. పోలీస్ ఉద్యోగాల కోసం ఎంతోకాలంగా ఎదురుచూస్తున్న నిరుద్యోగ యువతకు రాష్ట్ర ప్రభుత్వం శుభవార్త అందించింది. రాష్ట్రంలోని పోలీస్ అనుబంధ విభాగాల్లో మొత్తం 7,437 పోస్టుల భర్తీకి ఆర్థిక శాఖ అధికారిక అనుమతులు మంజూరు చేసింది.
మొదట ప్రభుత్వం 5,000 పోస్టుల భర్తీకి ఆమోదం తెలిపినప్పటికీ, తాజాగా మరో 2,437 పోస్టులను అదనంగా చేర్చుతూ ఉత్తర్వులు జారీ చేసింది. దీంతో భర్తీ చేయనున్న పోస్టుల మొత్తం సంఖ్య 7,437కు చేరింది.
ఈ నియామకాలలో వివిధ విభాగాలకు చెందిన ఖాళీలు ఉన్నాయి. వాటిలో ఫైర్ డిపార్ట్‌మెంట్‌లో 790 పోస్టులు, స్పెషల్ ప్రొటెక్షన్ ఫోర్స్ (SPF)లో 1,424 పోస్టులు, జైళ్ల శాఖలో 223 పోస్టులు, అలాగే పోలీస్ శాఖలోని ఇతర విభాగాల్లో సుమారు 5,000 పోస్టులు భర్తీ చేయనున్నారు.
త్వరలో అధికారిక నోటిఫికేషన్
ఆర్థిక శాఖ నుంచి పూర్తి స్థాయి అనుమతులు లభించడంతో నియామక ప్రక్రియకు మార్గం సుగమమైంది. ఈ పోస్టులకు సంబంధించిన అధికారిక రిక్రూట్‌మెంట్ నోటిఫికేషన్‌ను త్వరలో విడుదల చేయనున్నట్లు తెలంగాణ స్టేట్ పోలీస్ రిక్రూట్‌మెంట్ బోర్డు (TSLPRB) తెలిపింది.
ఉద్యోగాలకు దరఖాస్తు చేయదలిచిన అభ్యర్థులు అర్హతలు, వయోపరిమితి, ఎంపిక విధానం, సిలబస్, దరఖాస్తు తేదీలు వంటి పూర్తి వివరాల కోసం TSLPRB అధికారిక ప్రకటనను గమనించాలని అధికారులు సూచించారు.
నిరుద్యోగుల డిమాండ్‌కు ప్రభుత్వం స్పందన
ఇటీవల పోలీస్ నియామకాల్లో కేవలం 5,000 పోస్టులకే పరిమితం చేయడాన్ని వ్యతిరేకిస్తూ దిల్‌సుఖ్‌నగర్‌లో నిరుద్యోగ యువత పలుమార్లు ఆందోళనలు నిర్వహించారు. పోస్టుల సంఖ్యను పెంచాలని వారు ప్రభుత్వాన్ని డిమాండ్ చేశారు. ఈ నేపథ్యంలో అదనంగా 2,437 పోస్టులకు అనుమతి ఇవ్వడం నిరుద్యోగులకు ఊరటనిచ్చే నిర్ణయంగా భావిస్తున్నారు.