D Spiritual: Mar 12: పవిత్రమైన కాశీ యాత్రకు వెళ్లే చాలా మంది భక్తులు అక్కడి నుండి గంగాజలాన్ని ఇంటికి తీసుకురావడం పరిపాటిగా భావిస్తారు. ముఖ్యంగా కేదార్ ఘాట్ లేదా మణికర్ణిక ఘాట్ వంటి ప్రాంతాల నుండి గంగాజలాన్ని సేకరించి ఇంటికి తెచ్చుకోవడం జరుగుతుంది. అయితే సంప్రదాయం తెలిసిన పెద్దలు ఈ విషయంలో ఒక ముఖ్యమైన సూచన చేస్తారు. వారి అభిప్రాయం ప్రకారం కాశీ నుండి తీసుకొచ్చిన గంగాజలాన్ని ఇంట్లో ఉంచుకోవడం శ్రేయస్కరం కాదని చెబుతారు.
దీనికి ప్రధాన కారణం కాశీని “మహాస్మశానం”గా పరిగణించడం. పుట్టుక ఎంత సత్యమో, మరణం కూడా అంతే సత్యమని గుర్తుచేసే స్థలం కాశీ అని భావిస్తారు. ప్రతి జీవి తన శరీరాన్ని విడిచిన తర్వాత ఏ మట్టిలోనుంచి పుట్టిందో అదే మట్టిలో కలిసిపోతుందనే శాశ్వత సత్యాన్ని ఈ క్షేత్రం తెలియజేస్తుంది. ప్రళయకాలంలో కూడా ప్రకాశిస్తూ ఉండే పవిత్ర నగరం కావడంతో దీనికి “కాశీ” అనే పేరు వచ్చిందని పురాణాలు చెబుతాయి. అందువల్ల అంతిమ సత్యాన్ని గుర్తుచేసే ఈ మహాస్మశాన ప్రాంతం నుండి నీటిని తెచ్చి ఇంట్లో ఉంచుకోవడం మంచిది కాదని సంప్రదాయవేత్తలు అంటారు.
అయితే గంగాజలం సేకరించాలంటే ఎక్కడి నుంచి తీసుకోవాలి అనే ప్రశ్నకు సరైన సమాధానం ప్రయాగరాజ్. పూర్వకాలంలో యాత్రలు ఎంతో నియమ నిష్టలతో జరిగేవి. కాశీకి వెళ్లినవారు ప్రయాగను కూడా తప్పకుండా సందర్శించేవారు, ఎందుకంటే ప్రయాగ కాశీ యాత్రలో ఒక ముఖ్యమైన భాగంగా పరిగణించబడేది. అందుకే అక్కడి గంగా జలాన్ని సేకరించడం అత్యంత శుభప్రదంగా భావిస్తారు.
ప్రయాగలోని త్రివేణి సంగమం వద్ద గంగా నది, యమున నది మరియు అంతర్వాహినిగా ప్రవహిస్తుందని నమ్మే సరస్వతి నదిలు కలుస్తాయి. ఇక్కడ ఒకవైపు ముదురు ఆకుపచ్చ రంగులో యమున నది ప్రవహిస్తుండగా, మరోవైపు తెల్లని స్వచ్ఛమైన గంగా నది ప్రవహిస్తుంది. ఈ రెండు నదులు కలిసే ప్రాంతంలో నీటి రంగు స్పష్టంగా వేరు వేరుగా కనిపిస్తూ కలిసిపోవడం ఒక ప్రత్యేక దృశ్యంగా ఉంటుంది.
సంప్రదాయం ప్రకారం ఉత్తరాన్నుండి దక్షిణానికి ప్రవహిస్తున్న గంగా నది ప్రయాగ వద్ద దారి మళ్లి ఉత్తరవాహినిగా మారి తరువాత కాశీకి చేరుతుంది. అందువల్ల మహాస్మశానమైన కాశీకి వెళ్లకముందు ఉన్న గంగాజలాన్ని ప్రయాగ నుండి సేకరించడం శ్రేయస్కరమని పెద్దలు చెబుతారు. అందుకే కాశీలో విక్రయించే గంగాజలం సీసాలలో చాలా సందర్భాల్లో ప్రయాగ నుంచి తీసుకువచ్చిన గంగాజలాన్ని నింపి భక్తులకు అందిస్తారని చెబుతారు.
కాబట్టి గంగాజలం సేకరించాలనుకుంటే హరిద్వార్ వంటి గంగ ప్రవాహానికి ఎగువ ప్రాంతాల నుండి గానీ, లేదా ఇతర పవిత్ర ప్రదేశాల నుండి గానీ తీసుకురావచ్చు. కానీ సంప్రదాయం ప్రకారం కాశీ నుండి మాత్రం గంగాజలాన్ని ఇంటికి తీసుకురావడం మంచిది కాదని పెద్దలు సూచిస్తున్నారు.