DSports 23Feb 2026:అహ్మదాబాద్: టీ20 ప్రపంచకప్‌లో డిఫెండింగ్ ఛాంపియన్‌గా బరిలోకి దిగిన భారత జట్టుకు దక్షిణాఫ్రికా షాకిచ్చింది. సూపర్‌-8 గ్రూప్ 1 మ్యాచ్‌లో సఫారీ జట్టు 76 పరుగుల భారీ తేడాతో భారత్‌ను చిత్తు చేసింది. అయితే ఈ ఓటమి కంటే కూడా, టీమ్ మేనేజ్‌మెంట్ తీసుకున్న కొన్ని వివాదాస్పద నిర్ణయాలే ఇప్పుడు హాట్ టాపిక్‌గా మారాయి.
- ఈ మ్యాచ్‌లో టీమిండియా వైస్ కెప్టెన్ అక్షర్ పటేల్‌ను తుది జట్టు నుంచి తప్పించి, వాషింగ్టన్ సుందర్‌ను తీసుకోవడంపై విమర్శలు మొదలయ్యాయి. దక్షిణాఫ్రికా బ్యాటింగ్ లైన్-అప్‌లో ఎడమచేతి వాటం ఆటగాళ్లు ఉన్నారనే కారణంతో (టాక్టికల్ చేంజ్) సుందర్‌ను ఎంపిక చేసినట్లు కెప్టెన్ సూర్యకుమార్ యాదవ్ టాస్ సమయంలో వెల్లడించారు.
- కానీ, వాషింగ్టన్ సుందర్ కేవలం 2 ఓవర్లు మాత్రమే బౌలింగ్ చేసి వికెట్ తీయకుండా 17 పరుగులు ఇచ్చారు. బ్యాటింగ్‌లో కూడా 5వ స్థానంలో ప్రమోషన్ పొందిన సుందర్, 11 బంతుల్లో 11 పరుగులు మాత్రమే చేసి నిరాశపరిచారు. కీలక ఆటగాడైన అక్షర్ పటేల్‌ను బెంచ్‌కు పరిమితం చేయడం గంభీర్ చేసిన పెద్ద తప్పిదమని సోషల్ మీడియాలో నెటిజన్లు దుమ్మెత్తిపోస్తున్నారు.
- తొలుత బ్యాటింగ్ చేసిన దక్షిణాఫ్రికా, డేవిడ్ మిల్లర్ (63), డెవాల్డ్ బ్రెవిస్ (45) రాణించడంతో 187/7 పరుగులు చేసింది. భారత బౌలర్లలో బుమ్రా (3/15) మినహా మిగిలిన వారు భారీగా పరుగులు సమర్పించుకున్నారు. 188 పరుగుల లక్ష్య ఛేదనలో భారత బ్యాటర్లు తడబడ్డారు. శివం దూబే (42) ఒక్కడే పోరాడగా, మిగిలిన వారంతా వరుసగా పెవిలియన్ చేరారు. దీంతో భారత్ 111 పరుగులకే కుప్పకూలింది.
- వరుసగా 12 విజయాల తర్వాత భారత్‌కు ఎదురైన ఈ ఓటమి, కోచ్ గౌతమ్ గంభీర్ ప్రయోగాల వల్లే వచ్చిందని విశ్లేషకులు అభిప్రాయపడుతున్నారు. జట్టు కూర్పులో మార్పులు చేయకుండా ఉన్న ఫామ్‌ను కొనసాగించాల్సింది పోయి, కీలక మ్యాచులో అనవసర ప్రయోగాలు చేశారని ఫ్యాన్స్ అసహనం వ్యక్తం చేస్తున్నారు.
- “అక్షర్ పటేల్ వంటి మ్యాచ్ విన్నర్‌ను పక్కన పెట్టడం వెనుక ఉన్న తర్కం ఏంటి?” అని మాజీ క్రికెటర్లు సైతం ప్రశ్నిస్తున్నారు. సెమీఫైనల్ రేసులో నిలవాలంటే భారత్ తన తదుపరి మ్యాచ్‌ల్లో ఎటువంటి తప్పులు చేయకుండా గెలవాల్సి ఉంటుంది.