DSports 23Feb 2026:బ్యాంకాక్: ఆసియా క్రికెట్ కౌన్సిల్ (ACC) నిర్వహించిన మహిళల రైజింగ్ స్టార్స్ టీ20 టోర్నీలో భారత యువ జట్టు అదరగొట్టింది. ఉత్కంఠభరితంగా సాగిన ఫైనల్లో బంగ్లాదేశ్ జట్టును చిత్తు చేసి చాంపియన్‌గా నిలిచింది.
- టాస్ గెలిచి మొదట బ్యాటింగ్ చేసిన భారత్, నిర్ణీత 20 ఓవర్లలో 7 వికెట్ల నష్టానికి 134 పరుగులు చేసింది. ఒక దశలో 44 పరుగులకే 4 వికెట్లు కోల్పోయి కష్టాల్లో ఉన్న జట్టును తేజల్ హసబ్నిస్ తన అద్భుత ఇన్నింగ్స్‌తో ఆదుకుంది. ఆమె కేవలం 34 బంతుల్లో 3 ఫోర్లు, 2 సిక్సర్లతో 51 పరుగులు చేసి నాటౌట్‌గా నిలిచింది. కెప్టెన్ రాధా యాదవ్ (36) కూడా కీలక ఇన్నింగ్స్ ఆడటంతో భారత్ గౌరవప్రదమైన స్కోరును సాధించగలిగింది.
- 135 పరుగుల లక్ష్యంతో బరిలోకి దిగిన బంగ్లాదేశ్ ఏ దశలోనూ భారత బౌలర్లను ఎదుర్కోలేకపోయింది. భారత స్పిన్నర్లు క్రమం తప్పకుండా వికెట్లు తీస్తూ ప్రత్యర్థిని ఒత్తిడిలోకి నెట్టారు. ప్రేమ రావత్ 3 వికెట్లతో చెలరేగగా, సోనియా మెధియా, తనూజ కన్వర్ చెరో రెండు వికెట్లు తీశారు. దీంతో బంగ్లాదేశ్ 19.1 ఓవర్లలో 88 పరుగులకే ఆలౌట్ అయింది.