DSports 12Feb 2026:పల్లెకెలె: సొంత గడ్డపై జరుగుతున్న టీ20 ప్రపంచకప్లో శ్రీలంక జట్టు తన జోరును కొనసాగిస్తోంది. గ్రూప్-బిలో భాగంగా గురువారం ఒమన్తో జరిగిన మ్యాచ్లో లంక బ్యాటర్లు ఆకాశమే హద్దుగా చెలరేగిపోయారు. భారీ స్కోరు సాధించడమే కాకుండా, ప్రత్యర్థిని కట్టడి చేసి టోర్నీలో రెండో విజయాన్ని తమ ఖాతాలో వేసుకున్నారు. ఈ విజయంతో శ్రీలంక పాయింట్ల పట్టికలో అగ్రస్థానానికి చేరుకుంది.
- టాస్ గెలిచిన ఒమన్ మొదట ఫీల్డింగ్ ఎంచుకుంది. అయితే శ్రీలంక బ్యాటర్లు ఆ నిర్ణయం తప్పని నిరూపించారు. నిర్ణీత 20 ఓవర్లలో శ్రీలంక 5 వికెట్ల నష్టానికి 225 పరుగులు చేసింది. ఈ ఎడిషన్లో ఇప్పటివరకు ఇదే అత్యధిక స్కోరు కావడం గమనార్హం. ఓపెనర్లు విఫలమైనప్పటికీ, వన్డౌన్ బ్యాటర్ కుశాల్ మెండిస్ (61; 45 బంతుల్లో) ఇన్నింగ్స్ను నిలబెట్టాడు. మరోవైపు పవన్ రత్ననాయకె (60; 28 బంతుల్లో 8 ఫోర్లు, 1 సిక్స్) విధ్వంసక ఇన్నింగ్స్తో స్టేడియాన్ని హోరెత్తించాడు.
- ఈ మ్యాచ్లో హైలైట్ అంటే కెప్టెన్ దసున్ షనక బ్యాటింగ్. కేవలం 19 బంతుల్లోనే 50 పరుగులు (5 సిక్సర్లు, 2 ఫోర్లు) పూర్తి చేసి, టీ20 ప్రపంచకప్ చరిత్రలో శ్రీలంక తరఫున అత్యంత వేగవంతమైన అర్ధ సెంచరీ చేసిన ఆటగాడిగా రికార్డు సృష్టించాడు.226 పరుగుల భారీ లక్ష్యంతో బరిలోకి దిగిన ఒమన్, లంక బౌలర్ల ధాటికి ఏ దశలోనూ కోలుకోలేకపోయింది. దుష్మంత చమీర (2/19), మహీష్ తీక్షణ (2/11) ఆరంభంలోనే వికెట్లు తీసి ఒమన్ను ఒత్తిడిలోకి నెట్టారు. ఒమన్ జట్టులో మహమ్మద్ నదీమ్ (53*) ఒంటరి పోరాటం చేసినప్పటికీ, అతనికి ఇతర బ్యాటర్ల నుంచి సహకారం లభించలేదు. దీంతో ఒమన్ 20 ఓవర్లలో 9 వికెట్లు కోల్పోయి 120 పరుగులకే పరిమితమైంది.