వసంత పంచమి.. ఏ వయస్సులో అక్షరాభ్యాసం చేయించాలి, ఇంట్లో చేయించవచ్చా?

D Spiritual: Jan 23: జ్ఞానానికి అధిదేవత అయిన సరస్వతీ దేవి మాఘ శుక్ల పంచమి నాడు జన్మించినట్టు పురాణాలు పేర్కొంటున్నాయి. ఆ పవిత్ర రోజునే మనం వసంత పంచమి పర్వదినాన్ని ఘనంగా జరుపుకుంటాం. ఈ రోజు జ్ఞానం, విద్య, సృజనాత్మకతకు ప్రత్యేక ప్రాధాన్యత కలిగినదిగా భావిస్తారు.

సృష్టి ఆరంభంలో లోకానికి వాక్కును, చైతన్యాన్ని ప్రసాదించేందుకు బ్రహ్మదేవుడు అమ్మవారిని ఆవిర్భవింపజేశాడని విశ్వాసం. అందుకే ఈ రోజును శ్రీపంచమి, వాగీశ్వరి జయంతిగా కూడా పిలుస్తారు. అలాగే వసంత ఋతువు కూడా ఈ రోజుతోనే ప్రారంభమవుతుందని శాస్త్రాలు చెబుతున్నాయి.

శుభ ముహూర్తం విషయానికి వస్తే, 2026 సంవత్సరంలో వసంత పంచమి జనవరి 23వ తేదీ శుక్రవారం నాడు వచ్చింది. పంచమి తిథి శుక్రవారం తెల్లవారుజామున 2.28 గంటలకు ప్రారంభమవుతుంది. ఈ రోజున పూజలు చేయడానికి, పిల్లలకు అక్షరాభ్యాసం చేయించడానికి ఉదయం 7.15 గంటల నుంచి మధ్యాహ్నం 12.33 గంటల వరకు అత్యంత శుభప్రదమైన సమయంగా పండితులు సూచిస్తున్నారు.

సూర్యోదయ తిథికి ప్రాధాన్యత ఉన్న ఈ సమయంలో విద్యాభ్యాసం ప్రారంభిస్తే చదువుల తల్లి అయిన సరస్వతీ దేవి అనుగ్రహంతో పిల్లలు విద్యావంతులుగా, ప్రతిభావంతులుగా ఎదుగుతారని నమ్మకం.

వసంత పంచమి నాడు గుడికి వెళ్లలేని పరిస్థితి ఉంటే ఇంట్లోనే అక్షరాభ్యాసం చేయించవచ్చు. పురోహితులను పిలిపించి శాస్త్రోక్తంగా నిర్వహించవచ్చు. మంత్రాలు, విధివిధానాలు తెలిసి ఉంటే తల్లిదండ్రులే పిల్లలకు అక్షర దీక్ష ఇవ్వవచ్చు. సరస్వతీ దేవి చిత్రపటం ముందు బియ్యం పోసి, ఓంకారంతో అక్షరాభ్యాసం చేయిస్తే శుభఫలితాలు కలుగుతాయని విశ్వాసం.

భక్తి, నమ్మకంతో ఇంట్లో నిర్వహించే ఈ పవిత్ర కార్యం పిల్లల విద్యాభ్యాసానికి బలమైన పునాదిగా నిలుస్తుంది. అమ్మవారి అనుగ్రహంతో పిల్లల్లో జ్ఞానదీపం వెలుగుతుందని పెద్దలు చెబుతారు.

ఏ వయస్సులో అక్షరాభ్యాసం చేయించాలి? అనే ప్రశ్నకు పండితుల సమాధానం స్పష్టం. పిల్లలకు మూడు సంవత్సరాల వయస్సులో అక్షరాభ్యాసం చేయించడం అత్యంత శ్రేయస్కరమని సూచిస్తున్నారు. వసంత పంచమి వంటి శుభ తిథులు ఈ కార్యానికి ఎంతో అనుకూలమని అంటున్నారు.

అయితే దేవాలయంలో అక్షరాభ్యాసం చేయించేందుకు నక్షత్రం, తిథి సరిపోలలేదని ఆందోళన చెందాల్సిన అవసరం లేదని పండితులు చెబుతున్నారు. జ్ఞానప్రదాయిని అయిన సరస్వతీ దేవి సన్నిధిలో ఏ రోజైనా అక్షర దీక్ష తీసుకోవచ్చని వారు సూచిస్తున్నారు.

వసంత పంచమి రోజున అక్షరాభ్యాసం చేయించడం వీలుకాకపోతే, ఆశ్వయుజ మాసంలో వచ్చే శరన్నవరాత్రులలో మూల నక్షత్రం రోజున లేదా విజయదశమి పర్వదినాన ఈ కార్యాన్ని నిర్వహించవచ్చు. అది కూడా సాధ్యం కాకపోతే ఉత్తరాయణ పుణ్యకాలంలో మంచి తిథి, ముహూర్తం చూసుకుని అక్షరాభ్యాసం చేయించుకోవచ్చు. కనీసం దక్షిణాయనంలోనైనా అనుకూలమైన ముహూర్తం ఎంచుకుని ఈ పవిత్ర కార్యక్రమాన్ని నిర్వహించవచ్చని శాస్త్రాలు సూచిస్తున్నాయి.