నవగ్రహాలకు ఎలా ప్రదక్షణ చేయాలి

D Spiritual: Dec 13: నవగ్రహాలను తాకకుండానే ప్రదక్షిణలు చేయాలి

నవగ్రహ ప్రదక్షిణలకు ఒక నిర్దిష్టమైన పద్ధతి ఉంది. ఆ పద్ధతిని అనుసరించి ప్రదక్షిణలు చేస్తే విశేషమైన ఫలితం లభిస్తుందని శాస్త్రాలు చెబుతున్నాయి. అయితే చాలామందికి ఈ విధానాలపై సరైన అవగాహన ఉండదు. అందుకే నవగ్రహ ప్రదక్షిణలకు సంబంధించిన నియమాలను తెలుసుకోవడం ఎంతో అవసరం.

నవగ్రహ ప్రదక్షిణ విధానం

సాధారణంగా నవగ్రహాల ఆలయంలో సూర్య భగవానుని విగ్రహం మధ్యలో, తూర్పు దిశను అభిముఖంగా ఉంటుంది. భక్తులు ఆలయంలోకి ప్రవేశించేటప్పుడు సూర్యుడిని దర్శించుకుంటూ లోపలికి వెళ్లాలి. అనంతరం ఎడమ వైపు నుంచి, అంటే చంద్రుని వైపు నుంచి ప్రారంభించి, కుడి వైపు దిశగా తొమ్మిది ప్రదక్షిణలు చేయాలి.

శుచిత్వం ఎంతో ముఖ్యము

నవగ్రహాల చుట్టూ ఎప్పుడుపడితే అప్పుడు ప్రదక్షిణలు చేయరాదు. శుచిగా స్నానం చేసి, పరిశుభ్రమైన దుస్తులు ధరించిన తరువాత మాత్రమే నవగ్రహ ప్రదక్షిణలు చేయాలి. శరీర శుద్ధితో పాటు మనసు కూడా ప్రశాంతంగా ఉండేలా చూసుకోవాలి.

విగ్రహాలను తాకరాదు

చాలామంది ప్రదక్షిణలు చేస్తూ నవగ్రహ విగ్రహాలను తాకి నమస్కారం చేస్తుంటారు. కానీ ఇది శాస్త్రసమ్మతం కాదు. సాధారణ భక్తులు విగ్రహాలను తాకకుండా దూరం నుంచే ప్రదక్షిణలు చేయాలి. అయితే దీక్ష తీసుకున్నవారు లేదా ప్రత్యేక పూజలు నిర్వహించే వారు అభ్యంగన స్నానం చేసి, మడి దుస్తులు ధరించినప్పుడు మాత్రమే విగ్రహాలను తాకవచ్చు.

స్తోత్రపఠనం మరియు అదనపు ప్రదక్షిణలు

నవగ్రహ ప్రదక్షిణలు చేస్తున్న సమయంలో ప్రతి గ్రహాన్ని స్తుతిస్తూ నవగ్రహ స్తోత్రాలు పఠించడం శ్రేయస్కరం. తొమ్మిది గ్రహాలకు తొమ్మిది ప్రదక్షిణలు పూర్తి చేసిన తరువాత, ప్రత్యేకంగా రాహు మరియు కేతువులకు మరో రెండు ప్రదక్షిణలు చేయడం మంచిదని చెబుతారు. ఈ విధంగా మొత్తం పదకొండు ప్రదక్షిణలు చేయడం వల్ల అసుర స్వభావం గల రాహు–కేతువులు సంతృప్తి చెంది, వారి వల్ల కలిగే ఆటంకాలు తొలగుతాయని విశ్వాసం.