D Spiritual: Dec 5: ఆధ్యాత్మికం: మామూలుగా దేవాలయానికి వెళ్లిన వారు తిరిగి నేరుగా ఇంటికి రావాలని పెద్దలు చెబుతుంటారు. అయితే అలా చెప్పడం వెనుక ఉన్న నిజమైన కారణం ఏమిటో ఇప్పుడు తెలుసుకుందాం.
పెద్దల కాలం నుంచి కొన్ని సంప్రదాయాలను తూచా తప్పకుండా పాటిస్తూ వస్తున్నారు. కానీ వాటి వెనుక ఉన్న భావం, కారణం చాలా మందికి తెలియదు. దేవాలయం నుంచి నేరుగా ఇంటికి రావాలి అన్న నియమం కూడా అలాంటిదే. చాలామంది గుడికి వెళ్లిన తరువాత నేరుగా ఇంటికే రాకుండా వేరే వాళ్ల ఇంటికి వెళితే పొందిన పుణ్యం వారికి చేరుతుందని నమ్ముతారు.
అలా చెప్పడం వెనుక ఉన్న కారణం ఏమిటో జ్యోతిష్య శాస్త్రం ద్వారా తెలుసుకోవచ్చు. జ్యోతిష్య ప్రకారం మీరు ప్రత్యేకంగా గుడికి మాత్రమే వెళ్లి ఉంటే తప్పనిసరిగా నేరుగా ఇంటికి రావాలని సూచిస్తారు. అయితే మీరు బయట ఏదైనా పనిమీద వెళ్లి, దారిలో దేవాలయాన్ని దర్శించి, ఆ పని పూర్తిచేసుకుని తిరిగి ఇంటికి రావచ్చు—ఇందులో ఎలాంటి లోపం లేదట.
దేవాలయాలు పవిత్రమైన ప్రదేశాలు. అక్కడ పొందిన ఆధ్యాత్మిక శక్తిని, శాంతిని, పవిత్రతను ఇంటికి తీసుకురావడానికి నేరుగా ఇంటికి రావడం మంచిదని పెద్దలు చెప్పిన కారణం ఇదే. దేవాలయంలో కలిగిన ఆ అనుభూతి మధ్యలో వేరే చోట నిలిచిపోవడం వల్ల తగ్గుతుందని నమ్మకం.
చాలామంది దేవాలయానికి వెళ్లి వచ్చిన తర్వాత కాళ్లు కడుక్కుంటారు. కానీ సంప్రదాయాల ప్రకారం అలా వెంటనే చేయకూడదట. దేవాలయం నుంచి వచ్చిన వెంటనే కాళ్లు కడుక్కుంటే దైవ దర్శనం ద్వారా వచ్చిన ఫలం, పుణ్యం తగ్గిపోతుందని నమ్మకం ఉంది.
ఇంటికి వచ్చిన తర్వాత కనీసం ఐదు నిమిషాలు ఆగి, ఆ తర్వాతే కాళ్లు కడుక్కోవాలని సూచిస్తారు. ఒకవేళ దేవాలయం నుంచి వచ్చిన తరువాత స్నానం చేయాలనుకుంటే కనీసం 48 నిమిషాలు ఆగడం ఉత్తమం. ఈ 48 నిమిషాలను ఒక ముహూర్త కాలంగా పరిగణిస్తారు.
కాబట్టి, దేవాలయానికి ప్రత్యేకంగా వెళితే తప్పనిసరిగా నేరుగా ఇంటికి రావడం, కొద్దిసేపు ఆ పవిత్రతలో ఉండడం, తరువాతే ఇతర పనులు చేసుకోవడం మంచిదని పండితులు సూచిస్తున్నారు.