D Spiritual: Dec 3: “గణపతి బప్పా మోరియా”… ఈ నినాదం వినగానే మనసు ఉల్లాసంగా మారిపోతుంది. గణపతి వేడుకలలో, ఊరేగింపుల్లో, పూజా కార్యక్రమాల్లో ఈ నినాదం ప్రతిధ్వనిస్తూ ఉంటుంది. కానీ “మోరియా” అనే పదం ఎందుకు అంటారు? దీని వెనుక ఒక ఆసక్తికరమైన కథ ఉంది.
పురాణాల ప్రకారం, “మోరియా” అనేది స్వామి మోరియా గోసావి అనే మహానుభావుని పేరు. ఆయన గణపతిపై అపారమైన భక్తితో ఆరాధన చేసేవారు. పుణెలో నివసించిన ఈ మహాసిద్ధుడు గణపతి మహిమను ప్రజలకు తెలియజేశాడు. అతని భక్తి ఎంత గాఢమైందంటే, గణపతిదేవుడు ఆయన కోరిక మేరకు ప్రత్యక్షమైనాడని కూడా విశ్వసిస్తారు.
మోరియా గోసావి తన జీవితం అంతా గణపతి సేవకే అంకితం చేశాడు. చివరకు, లోకాలన్నింటినీ విడిచి, గణపతిలోనే లీనమైనాడని కథలు చెబుతున్నాయి. ఆయన గణపతికి అత్యంత ప్రియభక్తుడే కాబట్టి, గణపతిని పిలిచేటప్పుడు ఆయన పేరు కూడా గౌరవంతో పాటు జతచేశారు.
ఆ విధంగానే “గణపతి బప్పా… మోరియా!” అనే నినాదం ఏర్పడింది. ఇది కేవలం గణపతిని పిలుపు మాత్రమే కాదు; గణపతికి అత్యంత ప్రియభక్తుడైన మోరియా గోసావిని స్మరించుకునే విధంగా ప్రజలు నినాదం చేస్తారు.
ఇందుకే ఈ నినాదం వినగానే భక్తులలో ఉత్సాహం, ఆనందం, భక్తి రెట్టింపు అవుతాయి. గణపతి బప్పా మోరియా… అగల బర్పా లవ్కర్యా! (మళ్ళీ త్వరగా రా బప్పా!)