D Spiritual: Nov 24: భారతీయ సంస్కృతిలో పూజా విధానాలకు ఉన్న ప్రత్యేకతకు ప్రపంచమే గర్విస్తుంది. వారంలోని ఏడు రోజులను ఒక్కో దేవతకు అంకితం చేసే ఆచారం వేల ఏళ్లుగా కొనసాగుతోంది. ఇందులో సోమవారం పరమేశ్వరుడికి అంకితం చేయబడి, దేశవ్యాప్తంగా భక్తులు ఈ రోజున భోళా శంకరుడిని భక్తిశ్రద్ధలతో పూజిస్తారు. శివుడు అభిషేక ప్రియుడు కావడంతో గంగాజలం, పంచామృతం, పండ్లతో అభిషేకం చేసి పరమాన్నం వంటి నైవేద్యాలు సమర్పించడం సాధారణంగా కనిపించే ఆచారం.
అయితే, శివుడికి మాంసాన్ని నైవేద్యంగా సమర్పించే ఆలయం కూడా ఉందని చాలా మందికి తెలియదు. పురాణాలలో చెప్పబడిన భక్త కన్నప్ప శివుడికి మాంసాన్ని నైవేద్యంగా పెట్టినట్టు కథలు చెప్పినప్పటికీ, ఈ ఆచారం ఇప్పటికీ కొనసాగుతున్న ఏకైక ఆలయం ఆంధ్రప్రదేశ్లోని ఒక చిన్న గ్రామంలో ఉంది. అంతపురం జిల్లా పెనుగొండ మండలం మడకశిర ప్రాంతంలో ఉన్న ఈ ఆలయం తన ప్రత్యేకతతో భక్తుల దృష్టిని ఆకర్షిస్తోంది.
పురాణాల ప్రకారం, ఈ ఆలయాన్ని స్వయంగా భక్తులే నిర్మించినట్లు కథనాలు చెబుతున్నాయి. సుమారు 1200 సంవత్సరాల క్రితం ఈ ప్రాంతం శిథిలమై ప్రజలు వేరే ప్రాంతాలకు తరలిపోయి, కొన్ని సంవత్సరాల తరువాత తిరిగి ఇక్కడ స్థిరపడ్డారు. అప్పట్లో వారికి శివలింగం, ఆంజనేయ స్వామి విగ్రహం, మహిషాసుర మర్దిని విగ్రహం లభించడంతో వాటిని ప్రతిష్టించి ఆలయాన్ని నిర్మించారు. ప్రజలు ఈ శివలింగాన్ని నీలకంటేశ్వర స్వామిగా ఆరాధించడంతో గ్రామానికి ‘నీలకంఠాపురం’ అనే పేరు చేరింది.
ఇక్కడి ప్రజలు ఇప్పటికీ శివుడికి మాంసాన్ని నైవేద్యంగా సమర్పించే ఆచారాన్ని కొనసాగిస్తున్నారు. దేశంలో ఇతర ఎక్కడా లేని ఈ ప్రత్యేక నైవేద్య విధానం కారణంగా ఈ ఆలయం ప్రత్యేక గుర్తింపు పొందింది. చుట్టుపక్కల గ్రామాల ప్రజలు ప్రతిరోజూ ఇక్కడకు వచ్చి శివారాధన చేస్తుంటారు. శ్రీరామనవమి, శివరాత్రి వంటి పర్వదినాలలో భక్తుల రద్దీ అధికంగా ఉంటుంది. కార్తీక, మాఘ మాసాలలో నీలకంటేశ్వర స్వామికి ప్రత్యేక పూజలు నిర్వహించటం ఈ ఆలయ ప్రధాన విశేషంగా నిలుస్తోంది.