D Spiritual: Nov 21: డబ్బు రావడం–పోవడం అనేది ప్రతి వ్యక్తి జీవితంలో సహజం. అయితే తెలియకుండానే చేసే కొన్ని అలవాట్ల వల్ల ఇంటి ఐశ్వర్యం తగ్గిపోతుందని శాస్త్రాలు చెబుతున్నాయి. హిందూ సంప్రదాయాల ప్రకారం లక్ష్మీదేవి పరిశుభ్రత, క్రమశిక్షణ, సంయమనం ఉన్న చోటే నివసిస్తుందని నమ్మకం. ఈ గుణాలు లేకపోతే ఎంత సంపాదించినా డబ్బు నిలవదని పేర్కొంటారు. మనం సరిదిద్దుకోవలసిన అలవాట్లను ఇప్పుడు తెలుసుకుందాం.
మురికి బట్టలు ధరించటం లక్ష్మీ కటాక్షానికి అడ్డంకిగా భావించబడుతుంది. మురికి దుస్తులు చెడు శక్తులను ఆకర్షిస్తాయని శాస్త్రాలు చెబుతున్నాయి. దీనికి పరిష్కారంగా ప్రతీ రోజు శుభ్రమైన దుస్తులు ధరించే అలవాటు చేసుకోవాలి. తాజా వస్త్రాలు ధరించడం మనస్సులో సానుకూలతను, ఆత్మవిశ్వాసాన్ని పెంచుతుంది.
దంతాలు, శరీర శుభ్రత పట్ల అలసత్వం చూపించడం ఆరోగ్యానికే కాకుండా ఆర్థిక స్థితికీ ప్రతికూలంగా ఉంటుందని అంటారు. ఉదయం, సాయంత్రం బ్రష్ చేయడం, శరీర శుభ్రతను దినచర్యలో భాగం చేసుకోవడం వల్ల మనస్సు ప్రశాంతంగా ఉంటుంది. ఏకాగ్రత పెరగడంతో పనుల్లో విజయం సాధించే అవకాశాలు, ఆదాయ మార్గాలు కూడా మెరుగవుతాయి.
అతిగా భోజనం చేయడం బద్ధకానికి కారణమవుతుందని శాస్త్రాలు సూచిస్తాయి. అధిక ఆహారం తీసుకునే వ్యక్తి ఆలస్యం, అలసత్వం, అదుపు లేని జీవనశైలికి లోనవుతాడు. అందుకే సమతుల్యంగా ఆహారం తీసుకోవడం, ఆహారంపై నియంత్రణ కలిగి ఉండడం అవసరం. దీతో మనస్సు తేలికగాను, నిర్ణయాలు తీసుకునే సామర్థ్యం మెరుగుగాను ఉంటుంది.
సూర్యోదయం తర్వాత నిద్రపోవడం వ్యక్తి అభివృద్ధిని తగ్గిస్తుందని నమ్మకం. అధిక నిద్ర సోమరితనానికి, ఫలితంగా అవకాశాలను కోల్పోవడానికి దారితీస్తుంది. కనుక సూర్యోదయానికి ముందే లేవే అలవాటు చేసుకోవాలి. ఉదయపు సమయం మానసిక శక్తిని పెంచి జీవితంలో పురోగతిని తీసుకొస్తుంది.
సోమరితనం, అపరిశుభ్రత ఉన్న చోట లక్ష్మీదేవి నివసించదని శాస్త్రాలు స్పష్టంగా చెబుతున్నాయి. అస్తవ్యస్త జీవనశైలి, చుట్టూ గందరగోళం, ఇంటి అపరిశుభ్రత – ఇవన్నీ ధనస్థిరత్వాన్ని తగ్గించే కారణాలు. అందుకే ఇల్లు, మనస్సు, ప్రవర్తన – ఈ మూడు రంగాల్లో పరిశుభ్రత, క్రమశిక్షణ ఉండాలని సూచిస్తున్నారు.