D Spiritual: Nov 18: సనాతన సంప్రదాయంలో రుద్రాక్షను అత్యంత పవిత్రమైనదిగా పరిగణిస్తారు. మహాదేవుడు స్వయంగా ధరించే ఈ రుద్రాక్షను రుద్రుని ప్రసాదంగా భావిస్తారు. రుద్రాక్ష జపమాల, కంకణం లేదా లాకెట్ రూపంలో ధరించడం ద్వారా శివుని ఆశీస్సులు లభిస్తాయని, ఆనందం, అదృష్టం కలుగుతాయని నమ్మకం. అలాగే అన్ని రకాల సమస్యల నుండి మనల్ని రక్షిస్తుందని కూడా విశ్వాసం. అయితే రుద్రాక్షను కొనుగోలు చేసే ముందు అది నిజమైనదా నకిలీదా అని తప్పనిసరిగా తెలుసుకోవాలి. అలాగే ధరించేటప్పుడు పాటించాల్సిన కొన్ని ముఖ్యమైన నియమాలు కూడా ఉన్నాయి.
నిజమైన రుద్రాక్షను, నకిలీ రుద్రాక్షను గుర్తించడానికి కొన్ని సులభమైన పద్ధతులు ఉన్నాయి. రుద్రాక్షను నీటిలో వేసినప్పుడు అది మునిగితే అసలైనదిగా, నీటిపై తేలితే నకిలీదిగా భావిస్తారు. అలాగే రెండు రాగి రేఖల మధ్య ఉంచినప్పుడు నిజమైన రుద్రాక్ష సవ్య దిశలో తిరుగుతుందని, అపసవ్య దిశలో తిరిగితే అది నకిలీదని నమ్మకం. మరో పరీక్షగా వేడి నీటిలో వేసి చూడవచ్చు — నకిలీ రుద్రాక్ష అయితే అది విడిపోతుంది. ఇంకా సందేహాలుంటే నిపుణుల వద్దా, ల్యాబ్లో పరీక్షించుకోవచ్చును.
రుద్రాక్ష ఎంత పూసలుగా ధరించాలి అనే విషయంలో కూడా శాస్త్రంలో స్పష్టమైన సూచనలు ఉన్నాయి. సాధారణంగా 108 పూసల జపమాలను అత్యంత పవిత్రంగా పరిగణిస్తారు. ఎందుకంటే 108 సంఖ్యను హిందూ సంప్రదాయంలో పరిపూర్ణ సంఖ్యగా భావిస్తారు. అవసరమైతే 54 లేదా 27 పూసల జపమాలను కూడా ధరించవచ్చు.
రుద్రాక్ష ధరించే విధానంలో కొన్ని ముఖ్యమైన నియమాలు ఉన్నాయి. రుద్రాక్షను తప్పనిసరిగా ఎరుపు, పసుపు లేదా తెలుపు దారంతో కట్టాలి. నల్ల దారంతో కట్టడం శాస్త్రోక్తం కాదు. వేరొకరు ధరించిన రుద్రాక్షను మళ్లీ మనం ధరించకూడదు. ధరించే ముందు గంగాజలంతో కడిగి, శివునికి అర్పించి, కనీసం ఒకసారి మంత్రజపం చేసిన తర్వాతే ధరించడం శుభం.
ప్రతి రాశికి శుభప్రదమైన రుద్రాక్ష రకాలు కూడా ఉన్నాయని జ్యోతిష్యం చెబుతుంది.
మీనం: 1 ముఖి రుద్రాక్ష
మేషం: 5 ముఖి
వృషభం: 6, 10 ముఖి
మిథునం: 4 లేదా 11 ముఖి
కర్కాటకం: 4 ముఖి లేదా గౌరీ శంకర్
సింహం: 5 ముఖి
కన్య: గౌరీ శంకర్
తులా: 7 ముఖి, గణేశ రుద్రాక్ష
వృశ్చికం: 8 ముఖి, గణేశ రుద్రాక్ష, 3 ముఖి
ధనుస్సు: 9 లేదా 1 ముఖి
మకరం: 10, 13 ముఖి
కుంభం: 7 ముఖి