D Spiritual: Nov 12: హిందూమతంలో ప్రకృతి ప్రాధాన్యం
హిందూ మతంలో ప్రకృతి పాత్ర చాలా కీలకం. ప్రకృతిలోని ప్రతీ దానిలో దైవత్వం ఉందని విశ్వసిస్తారు. అందుకే మన సనాతన ధర్మంలో ప్రకృతి ఆరాధన ఒక ప్రధానమైన ఆచారం. ముఖ్యంగా వృక్షాలు (చెట్లు) పట్ల పండితులు ప్రత్యేక గౌరవం చూపారు.
దేవతా వృక్షాల ప్రాధాన్యం
సనాతన ధర్మంలో రావి, మర్రి, మారేడు, తులసి వంటి కొన్ని చెట్లను పరమ పవిత్రమైనవిగా పరిగణిస్తారు. వాటిని ఆరాధించడానికి ప్రత్యేక నియమాలు, విధులు కూడా పేర్కొన్నారు.
పురాణాలలో చెప్పబడిన పదిహేను దేవతా వృక్షాలు
- రావి చెట్టు
- మర్రి చెట్టు
- వేప చెట్టు
- ఉసిరి చెట్టు
- తులసి చెట్టు
- మారేడు చెట్టు
- అవిశ చెట్టు
- జువ్వి చెట్టు
- మోదుగ చెట్టు
- మామిడి చెట్టు
- జిల్లేడు చెట్టు
- వెలగ చెట్టు
- ఉత్తరేణి చెట్టు
- పెద్దరేగి చెట్టు
- నిమ్మ చెట్టు
ఈ 15 వృక్షాలను దేవతా వృక్షాలుగా పురాణాలలో పేర్కొన్నారు.
వృక్షాల ఆరాధనా విధానం
ఈ వృక్షాలను దర్శించినప్పుడు ప్రదక్షిణం, నమస్కారం చేసి, అవకాశం ఉన్నప్పుడు పసుపు, కుంకుమ, గంధం, పూలు, దీపం, ధూపం, నైవేద్యం, హారతితో పూజించాలి.
రావి, మర్రి, వేప, ఉసిరి, తులసి, మారేడు, జువ్వి, వెలగ వంటి వృక్షాలు అందుబాటులో ఉన్నపుడు, ప్రతీ రోజూ సూర్యోదయానికి ముందు స్నానం చేసి దీపారాధన చేసి తొమ్మిది ప్రదక్షిణలు చేయాలి.
వృక్ష పూజ ఫలితం
ఇలా పూజ చేసినవారికి గ్రహబాధలు, గ్రహచార దోషాలు తొలగి, పరమాత్మ ప్రసన్నుడై ధర్మార్థకామమోక్షాలు ప్రసాదిస్తాడు. రోజూ చేయలేకపోతే కనీసం బుధవారం, గురువారం, శుక్రవారం, శనివారం పూజ చేయడం మంచిదని శాస్త్రాలు చెబుతున్నాయి.
ప్రత్యామ్నాయ పూజా విధానం
ఈ వృక్షాలు అందుబాటులో లేని సందర్భంలో, గోవు, లేదా సద్బ్రాహ్మణుడు, లేదా తులసి చెట్టు చుట్టూ ప్రదక్షిణలు చేయవచ్చు.అలా చేసినవారికి సకల కార్యసిద్ధి లభిస్తుంది.