బాలీవుడ్ బాద్‌షా షారుఖ్ ఖాన్ ప్రస్తుతం తన సినిమాల ఎంపికలో చాలా జాగ్రత్తగా వ్యవహరిస్తున్నారు. వరుస విజయాలతో మంచి ఫామ్‌లో ఉన్న ఆయన.. ఇకపై కూడా భారీ స్థాయిలో ఉండే కథలకే ఓకే చెప్పాలని చూస్తున్నట్లు తెలుస్తోంది. ప్రస్తుతం సిద్ధార్థ్ ఆనంద్ దర్శకత్వంలో తెరకెక్కుతున్న ‘కింగ్’పై ఫోకస్ పెట్టిన షారుఖ్.. ఆ తర్వాత సౌత్‌కు చెందిన స్టార్ డైరెక్టర్లతో సినిమాలు చేసే అవకాశాలపై ఇండస్ట్రీలో ఆసక్తికరమైన చర్చ నడుస్తోంది.
ఇప్పటికే ‘జవాన్’తో బ్లాక్‌బస్టర్ అందించిన అట్లీతో షారుఖ్ మరోసారి కలవబోతున్నారనే వార్తలు చాలాకాలంగా వినిపిస్తున్నాయి. ఈ కాంబినేషన్‌కు ప్రేక్షకుల్లోనూ భారీ క్రేజ్ ఉంది. అయితే వీరి తదుపరి సినిమా ‘జవాన్ 2’నా లేక కొత్త కథనా అనే విషయంలో ఇంకా స్పష్టత లేదు. ప్రస్తుతం అట్లీ అల్లు అర్జున్ హీరోగా తెరకెక్కుతున్న ‘రాకా’తో బిజీగా ఉన్నారు. ఈ ప్రాజెక్ట్ పూర్తయిన తర్వాత షారుఖ్‌తో మరో సినిమా చేసే అవకాశం ఉందనే ప్రచారం జరుగుతోంది.
మరోవైపు టాలీవుడ్ క్రియేటివ్ డైరెక్టర్ సుకుమార్ పేరు కూడా షారుఖ్ నెక్స్ట్ ప్రాజెక్ట్‌ల జాబితాలో వినిపిస్తోంది. మైత్రీ మూవీ మేకర్స్ బ్యానర్‌లో షారుఖ్ హీరోగా సుకుమార్ దర్శకత్వంలో ఓ భారీ సినిమా తెరకెక్కే అవకాశం ఉందనే టాక్ ఇండస్ట్రీ వర్గాల్లో ఉంది. అయితే ఈ ప్రాజెక్ట్‌కు సంబంధించి ఇప్పటివరకు ఎలాంటి అధికారిక ప్రకటన రాలేదు. షారుఖ్ లాంటి పాన్ ఇండియా స్టార్‌తో సుకుమార్ సినిమా చేస్తే అది ఎలాంటి స్కేల్‌లో ఉంటుందనే ఆసక్తి మాత్రం ఇప్పటికే మొదలైంది.
ఇక ‘కేజీఎఫ్’, ‘సలార్’ చిత్రాలతో తనదైన మాస్ మార్క్ క్రియేట్ చేసిన ప్రశాంత్ నీల్ పేరు కూడా షారుఖ్ ఖాన్‌తో ముడిపడి వినిపిస్తోంది. ప్రస్తుతం ఎన్టీఆర్‌తో ‘డ్రాగన్’ సినిమాను తెరకెక్కిస్తున్న ప్రశాంత్ నీల్.. ఈ ప్రాజెక్ట్ తర్వాత షారుఖ్‌తో సినిమా చేసే అవకాశంపై చర్చలు జరుగుతున్నాయనే ప్రచారం ఉంది. అయితే దీనిపై కూడా అధికారిక సమాచారం రావాల్సి ఉంది.
ప్రస్తుతం షారుఖ్ ఖాన్ పూర్తిగా ‘కింగ్’ సినిమాపైనే దృష్టి పెట్టారు. సిద్ధార్థ్ ఆనంద్ దర్శకత్వంలో తెరకెక్కుతున్న ఈ చిత్రం 2026 డిసెంబర్ 24న ప్రేక్షకుల ముందుకు రానుంది. ‘పఠాన్’, ‘జవాన్’ వంటి విజయాల తర్వాత తన తదుపరి సినిమాల విషయంలో మరింత జాగ్రత్తగా అడుగులు వేస్తున్న షారుఖ్.. సౌత్ డైరెక్టర్లతో భారీ ప్రాజెక్టులు చేయనున్నారనే వార్తలు ఆసక్తిని పెంచుతున్నాయి. అయితే అట్లీ, సుకుమార్, ప్రశాంత్ నీల్‌లలో ఎవరితో ముందుగా సినిమా చేస్తారనేది మాత్రం అధికారిక ప్రకటన వచ్చే వరకు సస్పెన్స్‌గానే ఉంటుంది.